മാഡ്രിഡ്: റെക്കോര്‍ഡുകള്‍ സ്വന്തമാക്കി മുന്നേറുന്ന ബാഴ്‌സലോണയുടെ അര്‍ജന്റൈന്‍ സൂപ്പര്‍ താരം ലയണല്‍ മെസ്സിക്ക് മറ്റൊരു പെരുമ കൂടി. യൂറോപ്യന്‍ ലീഗ് പോരാട്ടങ്ങളില്‍ ഒരു ടീമിന് വേണ്ടി ഏറ്റവും കൂടുതല്‍ ഗോള്‍ നേടുന്ന താരമെന്ന ലോക റെക്കോര്‍ഡ് ഇനി മെസ്സിക്ക് സ്വന്തം. കഴിഞ്ഞ ദിവസം റയല്‍ മാഡ്രിഡിനെതിരായ എല്‍ ക്ലാസിക്കോ പോരാട്ടത്തില്‍ പെനാല്‍റ്റി വലയിലാക്കി താരം ബാഴ്‌സലോണയ്ക്കായി 526 ഗോളുകള്‍ തികച്ചു. ബയേണ്‍ മ്യൂണിക്കിനായി 1965 മുതല്‍ 79 വരെ കളിച്ച ഇതിഹാസ താരം ഗെര്‍ഡ് മുള്ളറുടെ പേരിലുണ്ടായിരുന്ന 525 ഗോളുകളുടെ റെക്കോര്‍ഡാണ് ലിയോ പഴങ്കഥയാക്കിയത്. 572 മത്സരങ്ങളില്‍ നിന്നാണ് മുള്ളറുടെ നേട്ടമെങ്കില്‍ മെസ്സിക്ക് അത് മറികടക്കാന്‍ 608 മത്സരങ്ങള്‍ വേണ്ടിവന്നു.