മാവേലി സ്റ്റോറുകളില്‍ സബ്‌സിഡി സാധനങ്ങളില്ല

വിപണിയില്‍ സാധനങ്ങള്‍ക്ക് പൊള്ളുന്ന വിലയുള്ള സാഹചര്യത്തില്‍ സാധാരണക്കാര്‍ക്ക് സാധനങ്ങള്‍ സബ്‌സിഡിയായി എത്തിക്കുന്നുണ്ടെന്നുള്ള വകുപ്പ് മന്ത്രിയുടെ പ്രഖ്യാപനം പാഴ് വാക്കാകുന്നു. മാവേലി സപ്ലൈകോ സ്റ്റോറുകളില്‍ സബ്‌സിഡി സാധനങ്ങളില്ല.

രണ്ടുമാസം മുന്‍പ് വരെ ഒന്നും രണ്ടും സബ്‌സിഡി സാധനങ്ങളെങ്കിലുമുണ്ടായിരുന്ന പല സ്്‌റ്റോറുകളിലും പേരിന് ഒരു സാധനം പോലുമില്ല. പ്രതീക്ഷയോടെ വന്ന് മണിക്കൂറുകളോളം വരിനില്‍ക്കുന്നവര്‍ കുറഞ്ഞ നിരക്കിലുള്ള സാധനങ്ങള്‍ കിട്ടാതെ നിരാശരായി മടങ്ങേണ്ട അവസ്ഥയാണ് സപ്ലൈകോ സ്റ്റോറുകളിലുള്ളത്. വെളിച്ചെണ്ണ മാത്രമാണ് നിലവില്‍ സബ്‌സിഡിയുള്ള സാധനമായി സപ്ലൈകോ സ്‌റ്റോറുകളിലുള്ളത്.

അതേസമയം സബ്‌സിഡിയില്ലാത്ത സാധനങ്ങളെല്ലാം സ്റ്റോറുകളില്‍ ലഭ്യവുമാണ്. പൊതുവിപണിയിലാണെങ്കില്‍ വില കുതിച്ചുകയറുന്നുണ്ട്. മുളകിന് 225 രൂപയ്ക്കു മുകളിലായി, അരിക്ക് 60ല്‍ നിന്നും ഉയരുന്നു. മറ്റെല്ലാ ഉത്പന്നങ്ങള്‍ക്കും ആനുപാതികമായി വില വര്‍ധിക്കുന്നു.

സാധനങ്ങള്‍ ഇല്ലാത്തതിനാല്‍ ഔട്ട്‌ലൈറ്റുകളിലെത്തുന്നവരുമായി തര്‍ക്കങ്ങള്‍ പതിവാണെന്നും ഗോഡൗണുകളില്‍ നിന്നു സാധനങ്ങള്‍ എത്താറില്ലെന്നും ജീവനക്കാര്‍ പറയുന്നു.

അതേസമയം തല്‍സ്ഥിതി തുടരുകയാണെങ്കില്‍ സ്‌റ്റോറുകള്‍ അടച്ചുപൂട്ടേണ്ടിവരുമെന്ന് സപ്ലൈകോ പറയുന്നു. സബ്‌സിഡി ഇനങ്ങളിലെ കുടിശികയായി 1600 കോടിയോളം രൂപയാണ് സപ്ലൈകോയ്ക്ക് സര്‍ക്കാര്‍ നല്കാനുള്ളത്. കുടിശിക കൊടുക്കാത്തതിനാല്‍ കരാറുകാര്‍ ഉത്പന്നങ്ങള്‍ എത്തിക്കുന്നുമില്ല. സപ്ലൈകോയുടെ വിതരണ കേന്ദ്രങ്ങള്‍ കാലിയായി. അടിയന്തര ഇടപെടല്‍ വേണമെന്ന് സര്‍ക്കാരിനോട് ആവശ്യപ്പെട്ടെങ്കിലും കാര്യമായ പ്രതികരണം ലഭിച്ചിട്ടില്ല. ഇതേത്തുടര്‍ന്നാണ് സ്ഥാപനങ്ങള്‍ അടച്ചിടേണ്ടി വരുമെന്ന് സപ്ലൈകോ മുന്നറിയിപ്പു നല്കിയത്.