രാഹുല്‍ മാങ്കൂട്ടത്തിലിന്റെ മെഡിക്കല്‍ സര്‍ട്ടിഫിക്കറ്റ് വ്യാജമെന്ന പരാമര്‍ശം; എം.വി ഗോവിന്ദനെതിരേ 1 കോടിയുടെ മാനനഷ്ടക്കേസ്

തിരുവനന്തപുരം: യൂത്ത് കോണ്‍ഗ്രസ് അധ്യക്ഷന്‍ രാഹുല്‍ മാങ്കൂട്ടത്തിലിന്റെ മെഡിക്കല്‍ സര്‍ട്ടിഫിക്കറ്റ് വ്യാജമാണെന്ന പരാമര്‍ശത്തില്‍ സി.പി.എം സംസ്ഥാന സെക്രട്ടറി എം.വി ഗോവിന്ദന് വക്കീല്‍ നോട്ടീസ്. വാര്‍ത്താ സമ്മേളനം നടത്തി പരമാര്‍ശത്തില്‍ മാപ്പ് പറയണമെന്നും, ഒരു കോടി രൂപ നഷ്ടപരിഹാരം നല്‍കണമെന്നും ആവശ്യപ്പെട്ട് യൂത്ത് കോണ്‍ഗ്രസാണ് വക്കീല്‍ നോട്ടീസയച്ചത്.

കഴിഞ്ഞ ദിവസം മാധ്യമങ്ങളോട് സംസാരിക്കവെ രാഹുല്‍ മാങ്കൂട്ടത്തില്‍ കോടതിയില്‍ ഹാജരാക്കിയ ചികിത്സാ രേഖകളും, മെഡിക്കല്‍ സര്‍ട്ടിഫിക്കറ്റുകളും വ്യാജമാണെന്ന എം.വി ഗോവിന്ദന്‍ ആരോപിച്ചിരുന്നു. സി.പി.എം സംസ്ഥാന സെക്രട്ടറിയുടെ പ്രസ്താവന തരം താണതാണെന്നും നിയമ നടപടി സ്വീകരിക്കുമെന്നും യൂത്ത് കോണ്‍ഗ്രസ് നേതൃത്വം വ്യക്തമാക്കിയിരുന്നു.

ഇതിനെ തുടര്‍ന്നാണ് അഭിഭാഷകനായ മൃദുല്‍ ജോണ്‍ മാത്യൂ മുഖേന യൂത്ത് കോണ്‍ഗ്രസ് ഇപ്പോള്‍ വക്കീല്‍ നോട്ടീസയച്ചിരിക്കുന്നത്. രാഹുല്‍ മാങ്കൂട്ടത്തിലിന്റെ പേരില്‍ തന്നെയാണ് നോട്ടീസയച്ചിരിക്കുന്നത്. എം.വി ഗോവിന്ദന്‍ വാര്‍ത്താ സമ്മേളനം നടത്തി രാഹുലിനോട് മാപ്പ് പറയണമെന്നും, മാനനഷ്ടക്കേസില്‍ നഷ്ടപരിഹാരമായി 1 കോടി നല്‍കണമെന്നും നോട്ടീസില്‍ ആവശ്യപ്പെട്ടിട്ടുണ്ട്.