പൂച്ചാക്കല്‍:  പെട്രോള്‍ പമ്പില്‍ പാര്‍ക്ക് ചെയ്തിരുന്ന സ്വകാര്യ ബസിന്  തീപിടിച്ചത് പരിഭ്രാന്തി പരത്തി. ചൊവ്വാഴ്ച വെളുപ്പിന് രണ്ട് മണിയോടെയാണ് സംഭവം.ഇരുപത്തിനാല് മണിക്കൂറും പ്രവര്‍ത്തിക്കുന്ന ഈ പമ്പിന്റെ ഉടമയുടെ മാതാവിന്റെ മരണത്തെ തുടര്‍ന്ന് രാത്രി 11.00 മണി മുതല്‍ പമ്പ് പ്രവര്‍ത്തിച്ചിരുന്നില്ല.
ഓഫീസ് കെട്ടിടത്തില്‍ ഉറങ്ങുകയായിരുന്ന ജീവനക്കാരന്‍ സ്‌ഫോഡന ശബ്ദം കേട്ട് ഉണര്‍ന്നെഴുന്നേറ്റതോടെയാണ് പമ്പില്‍ പാര്‍ക്ക് ചെയ്തിരുന്ന ബസ് കത്തുന്നതായി കണ്ടത്. ഉടനെ മരണ വീട്ടില്‍ ഉണ്ടായിരുന്നവരെ വിവരം അറിയിച്ചു. തുടര്‍ന്ന് മറ്റ് ജീവനക്കാരും നാട്ടുകാരും എത്തി പമ്പില്‍  സൂക്ഷിക്കാറുള്ള ഫയര്‍ എക്‌സിക്യൂഷന്‍   ഉപയോഗിച്ച് തീ നിയന്ത്രണ വിധേയമാക്കി. ചേര്‍ത്തലയില്‍ നിന്നും  എത്തിയ രണ്ട് യൂണിറ്റ് ഫയര്‍ ആന്റ് റസ്‌ക്യൂ വിഭാഗം ഉദ്യോഗസ്ഥര്‍ ബസ്സിനുള്ളിലെ ബാറ്ററിയുമായുള്ള ബന്ധം വിചേദിച്ച് തീയണച്ചു.പൂച്ചാക്കല്‍ പോലീസും സ്ഥലത്തെത്തിയിരുന്നു. തീ പിടിച്ച ബസ്സിന് സമീപത്തുണ്ടായിരുന്ന ബസ്സ് നാട്ടുകാര്‍ തള്ളി മാറ്റുകയായിരുന്നു.