'ഇത് വളരെ കൂടുതലാണ്' - ഇലോൺ മസ്കിന് ഇത്രയേറെ തുക ശമ്പളം നൽകേണ്ടതില്ലെന്ന് കോടതി

വാഷിങ്ടൺ: ടെസ്‍ല സി.ഇ.ഒ ഇലോൺ മസ്കിന് അനുവദിച്ച വമ്പൻ ശമ്പള പാക്കേജ് കോടതി അസാധുവാക്കി. ഇലക്ട്രിക് കാർ കമ്പനിയായ ടെസ്‍ല മസ്‍കിന് പ്രതിവർഷം 55.8 ബില്യൺ ഡോളർ (നാൽപത്തി ആറായിരം കോടിയിലേറെ ഇന്ത്യൻ രൂപ) ശമ്ബളമായി നൽകാനുള്ള തീരുമാനമാണ് അസാധുവാക്കിയത്. ശമ്പള പാക്കേജ് അനുവദിച്ചതിൽ ടെസ്‍ല ബോർഡിന് പിഴവ് സംഭവിച്ചതായി ജഡ്ജി കാതലീൻ മക്കോർമിക് വിധിയിൽ വ്യക്തമാക്കി. കോടതി വിധിക്ക് പിന്നാലെ ടെസ്‌ലയുടെ ഓഹരികൾ ഇടിഞ്ഞു.

പ്രതിവർഷം 55.8 ബില്യൺ ഡോളർ ഇലോൺ മാസ്കിന് ശമ്പളം നൽകാനുള്ള പാക്കേജിന് 2018 ലാണ് ബോർഡ് അംഗീകാരം നൽകിയത്. കോർപ്പറേറ്റ് ചരിത്രത്തിലെ ഏറ്റവും വലിയ പാക്കേജുകളിലൊന്നാണ് മസ്കിന് അനുവദിച്ചിരുന്നത്. ഇതുവഴി ലോകത്തിലെ തന്നെ ഏറ്റവും വലിയ സമ്പന്നൻ മസ്‌ക് ആയി മാറി. എന്നാൽ, മസ്കിന് ഇത്രയും ശമ്പളം നൽകേണ്ട ആവശ്യമില്ലെന്ന് കാണിച്ച് ഓഹരി ഉടമകളിൽ ഒരാൾ ഹരജി നൽകുകയായിന്നു. ഈ ഹരജിയിലാണ് കോടതി ചൊവ്വാഴ്ച വിധി പറഞ്ഞത്.

ശമ്പളം സംബന്ധിച്ച് ഓഹരി ഉടമകളിൽ നിന്ന് അനുമതി വാങ്ങിയിരുന്നുവെന്ന് തെളിയിക്കാൻ ടെസ്‍ലക്കോ മസ്കിന്റെ അഭിഭാഷക​നോ കഴിയാത്തതാണ് മസ്കിന് തിരിച്ചടിയായത്. ലോകത്തിലെ ഏറ്റവും മികച്ച വ്യവസായിമാരിൽ ഒരാളായ മസ്കിന് കമ്പനിയിൽ ​എപ്പോഴും ശ്രദ്ധയുണ്ടെന്ന് ഉറപ്പാക്കാനാണ് ഇത്രയും വലിയ പാക്കേജ് നൽകിയതെന്നായിരുന്നു ടെസ്‍ല ഡയറക്ടർമാരുടെ കോടതിയിലെ വാദം. എന്നാൽ ഇത് കോടതി മുഖവിലയ്ക്ക് എടുത്തില്ല.

കോടതി തീരുമാനം പുറത്ത് വന്നതിന് പിന്നാലെ ടെസ്‍ല ഓഹരി വിലയിൽ ഇടിവ് രേഖപ്പെടുത്തി. കഴിഞ്ഞ അഞ്ച് ദിവസത്തിനിടെ ടെസ്‍ലയുടെ ഓഹരി വില 20 ശതമാനം ഇടിഞ്ഞിരുന്നു. ലോകത്തിലെ ഒന്നാമത്തെ സമ്പന്നൻ എന്ന സ്ഥാനവും ഇലോൺ മസ്കിന് കഴിഞ്ഞ ദിവസം നഷ്ടമായിരുന്നു. ലൂയി വട്ടോണ്‍, ഡിയോര്‍, ടിഫാനി തുടങ്ങിയ ആഡംബര ബ്രാന്‍ഡുകളുടെ ഉടമകളായ ഫ്രഞ്ച് കമ്പനിയായ എല്‍.വി.എം.എച്ചിന്റെ സി.ഇ.ഒയും ചെയര്‍മാനുമായ ബെര്‍ണാഡ് അര്‍ണോയാണ് നിലവിൽ ലോകത്തിലെ അതിസമ്പന്നൻ.