രാമക്ഷേത്രം സന്ദര്‍ശിക്കാന്‍ കെജ്‌രിവാള്‍ നാളെ അയോധ്യയില്‍

ന്യൂഡല്‍ഹി: ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍ നാളെ കുടുംബത്തോടൊപ്പം അയോധ്യയിലെ രാമക്ഷേത്രം സന്ദര്‍ശിക്കും. ഭാര്യയും മാതാപിതാക്കളുമാണ് കെജ്‌രിവാളിനൊപ്പമുണ്ടാവുക. പഞ്ചാബ് മുഖ്യമന്ത്രി ഭഗവന്ത് മാനും അദ്ദേഹത്തോടൊപ്പം അയോധ്യയിലെത്തും.

ജനുവരി 22ന് നടന്ന പ്രാണപ്രതിഷ്ഠാ ചടങ്ങിലേക്ക് കെജ്‌രിവാളിന് ഔദ്യോഗിക ക്ഷണം ലഭിച്ചിരുന്നില്ല. കുടുംബത്തോടൊപ്പം പിന്നീട് ക്ഷേത്രം സന്ദര്‍ശിക്കുമെന്ന് അദ്ദേഹം നേരത്തെ തന്നെ വ്യക്തമാക്കിയിരുന്നു. പ്രാണപ്രതിഷ്ഠാ ചടങ്ങ് രാഷ്ട്രീയവത്കരിച്ചെന്ന് ആരോപിച്ചാണ് കോണ്‍ഗ്രസ് അടക്കമുള്ള പാര്‍ട്ടികള്‍ ചടങ്ങ് ബഹിഷ്‌കരിച്ചിരുന്നു. എന്നാല്‍ കോണ്‍ഗ്രസ്, ബി.എസ്.പി നേതാക്കള്‍ പിന്നീട് രാമക്ഷേത്രത്തില്‍ ദര്‍ശനത്തിന് എത്തി.

അതേസമയം സമാജ്വാദി പാര്‍ട്ടിയുടെ നേതാക്കള്‍ ഇതുവരെ അയോധ്യ സന്ദര്‍ശിച്ചിട്ടില്ല. ന്യൂനപക്ഷത്തെ പ്രീണിപ്പിക്കാനാണ് എസ്.പി നേതാക്കള്‍ അയോധ്യ സന്ദര്‍ശനത്തില്‍നിന്ന് വിട്ടുനില്‍ക്കുന്നതെന്നാണ് യു.പി ഉപമുഖ്യമന്ത്രിമാരായ കേശവ് പ്രസാദ് മൗര്യയും ബ്രജേഷ് പതക്കും ആരോപിച്ചത്.