സന്ദർശക വിസയിൽ ബഹ്‌റൈനിലെത്തിയ കോഴിക്കോട് സ്വദേശിനി മരിച്ച നിലയിൽ

മനാമ: ബഹ്‌റൈനിൽ ജോലി അന്വേഷിച്ച് എത്തിയ കോഴിക്കോട് സ്വദേശിനിയെ താമസസ്ഥലത്ത് മരിച്ച നിലയിൽ കണ്ടെത്തി. കാണാതായതിനെ തുടർന്ന് നടത്തിയ അന്വേഷണത്തിലാണ് യുവതിയെ ഫ്ലാറ്റിൽ മരിച്ച നിലയിൽ കണ്ടെത്തിയത്. ചേമഞ്ചേരി പൂക്കാട് മുക്കാടി വളപ്പിൽ അസനാസ് വെള്ളമണ്ണിനെ (37) യാണ് ബഹ്‌റൈൻ ഗുദൈബിയയിലെ താമസ സ്‌ഥലത്ത്‌ മരിച്ച നിലയിൽ കണ്ടെത്തി.

സന്ദർശക വിസയിൽ ബഹ്റൈനിൽ എത്തിയ അസനാസിനെ കഴിഞ്ഞ കുറച്ച് ദിവസങ്ങളായി ഫോൺ ബന്ധപ്പെടാൻ സാധിച്ചിരുന്നില്ല. വിവരമൊന്നും ലഭിക്കാതായതിനെ തുടർന്ന് നാട്ടിൽ നിന്ന് ബന്ധുക്കളാണ് സഊദിയിലെ സുഹൃത്തുക്കൾ മുഖേന ബഹ്‌റൈനിലെ സാമൂഹ്യ പ്രവർത്തകരുമായി ബന്ധപ്പെട്ട് കാണാതായ വിവരം അറിയിച്ചത്. പ്രവാസി ലീഗൽ സെൽ പൊലിസ് അധികൃതരുമായി ബന്ധപ്പെട്ടതിനെ തുടർന്ന് നടത്തിയ തിരച്ചിലിന് ഒടുവിലാണ് യുവതിയെ ഫ്ലാറ്റിൽ മരിച്ച നിലയിൽ കണ്ടെത്തിയത്. സംഭവത്തിൽ പൊലിസ് അന്വേഷണം പുരോഗമിക്കുകയാണ്.