ദുബൈ: പുതിയ മെംബര്‍ഷിപ് അടിസ്ഥാനത്തില്‍ നിലവില്‍ വന്ന ദുബൈ കെഎംസിസി തലശ്ശേരി മണ്ഡലം കമ്മിറ്റിയുടെ പ്രവര്‍ത്തനോദ്ഘാടനം നടന്നു. ഒരു വര്‍ഷം നീളുന്ന 'നന്മ 2024'  എന്ന പദ്ധതിക്ക് ചടങ്ങില്‍ തുടക്കം കുറിച്ചു. ദുബൈ കെഎംസിസി രക്ഷാധികാരിയും അല്‍ ഷമാലി ഗ്രൂപ് ചെയര്‍മാനുമായ സി.കെ അബ്ദുല്‍ മജീദ് ചടങ്ങ് ഉദ്ഘാടനം ചെയ്തു. ജീവകാരുണ്യ,  സാമൂഹിക പ്രവര്‍ത്തനത്തിന് മാതൃകയായി പ്രവര്‍ത്തിക്കുന്ന കെഎംസിസി കമ്മിറ്റികളുടെ പ്രവര്‍ത്തനം മഹത്തരമാണെന്നും മികച്ച നേതൃഗുണമുള്ള സമൂഹത്തെ വാര്‍ത്തെടുക്കാന്‍ നൂതന പദ്ധതികള്‍ ആസൂത്രണം ചെയ്ത് പുതിയ കാലത്തെ പ്രവര്‍ത്തനം സജീവമാക്കണമെന്നും അദ്ദേഹം ഉദ്ഘാടന പ്രസംഗത്തില്‍ പറഞ്ഞു. 'നന്മ 2024' ബ്രോഷര്‍ പ്രകാശനം ദുബൈ സംസ്ഥാന കെഎംസിസി സെക്രട്ടറി ഒ.മൊയ്തുവിന് നല്‍കി സി.കെ അബ്ദുല്‍ മജീദ് നിര്‍വഹിച്ചു. തലശ്ശേരി മണ്ഡലം കെഎംസിസി പ്രസിഡന്റ് സിറാജ് കതിരൂര്‍ അധ്യക്ഷത വഹിച്ചു.  ദുബൈ കെഎംസിസി കണ്ണൂര്‍ ജില്ലാ പ്രസിഡന്റായി തെരഞ്ഞെടുക്കപ്പെട്ട പി.കെ ഇസ്മായില്‍ പൊട്ടങ്കണ്ടി, ട്രഷറര്‍ റഹ്ദാദ് മൂഴിക്കര, വൈസ് പ്രസിഡന്റ് റഫീഖ് കോറോത്, വിശിഷ്ടാതിഥി ന്യൂ മാഹി പഞ്ചായത്ത് മുസ്‌ലിം ലീഗ് പ്രസിഡന്റ് പി.സി റിസാല്‍ എന്നിവര്‍ക്ക് മണ്ഡലം കമ്മിറ്റിയുടെ സ്‌നേഹോപഹാരം സി.കെ അബ്ദുല്‍ മജീദ് സമ്മാനിച്ചു. റഈസ് തലശ്ശേരി മുഖ്യ പ്രഭാഷണം നടത്തി. ഖത്തര്‍ കെഎംസിസി വനിതാ വിംഗ് സംസ്ഥാന ട്രഷറര്‍ സമീറ അന്‍വര്‍, ടി.പി അബ്ബാസ് ഹാജി, ടി.കെ റഈസുദ്ദീന്‍, മഹബൂബ് തലശ്ശേരി, മുഹമ്മദ് റസ, വി.പി അബൂബക്കര്‍, ജസ്ഫര്‍ മൂഴിക്കര പ്രസംഗിച്ചു. റമദാന്‍ റിലീഫ് വിഭവ സമാഹരണ ഉദ്ഘാടനം പി.വി റഷീദ് നിര്‍വഹിച്ചു. ഷാനവാസ് കിടാരന്‍ സ്വാഗതവും സഹീര്‍ പന്ന്യന്നൂര്‍ നന്ദിയും പറഞ്ഞു.