ഐ.ഐ.ഐ.ടി.എം ഗ്വാളിയോറില്‍ എംബിഎ പഠിക്കാം; പ്രവേശന നടപടികള്‍ ആരംഭിച്ചു; മാര്‍ച്ച് 30നകം അപേക്ഷിക്കണം

കേന്ദ്ര സര്‍ക്കാരിന് കീഴില്‍ ഗ്വാളിയോറിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഇന്‍ഫര്‍മേഷന്‍ ടെക്‌നോളജി ആന്‍ഡ് മാനേജ്‌മെന്റ് (IIITM) 2024 -25 വര്‍ഷത്തെ ദ്വിവത്സര മുഴുവന്‍ സമയ മാസ്റ്റര്‍ ഓഫ് ബിസിനസ് അഡ്മിനിസ്‌ട്രേഷന്‍ (എം.ബി.എ) പ്രോഗ്രാം പ്രവേശനത്തിന് അപേക്ഷ ക്ഷണിച്ചു. മാര്‍ക്കറ്റിങ്, ഫിനാന്‍സ്, ഓപ്പറേഷന്‍സ്, ഐ.ടി ആന്‍ഡ് സിസ്റ്റംസ്, ഹ്യൂമന്‍ റിസോഴ്‌സ് മാനേജ്‌മെന്റ് എന്നിവ സ്‌പെഷലൈസേഷനുകളാണ്. ഗവേഷണാധിഷ്ഠിത ഇന്റേണ്‍ഷിപ്പുമുണ്ട്.

യോഗ്യത
ഏതെങ്കിലും ഡിസിപ്ലിനില്‍ 60 ശതമാനം മാര്‍ക്കില്‍/ 6.50 CGPA യില്‍ കുറയാതെ ഫസ്റ്റ് ക്ലാസ് ബിരുദം. മാത്തമാറ്റിക്‌സ്/ സ്റ്റാറ്റിസ്റ്റിക്‌സ് ഒരു വിഷയമായി പഠിച്ചിരിക്കണം. പ്രാബല്യത്തിലുള്ള ഐ.ഐ.എം കാറ്റ് സ്‌കോര്‍ ഉണ്ടാവണം.

എസ്.സി/ എസ്.ടി/ പിഡബ്ല്യുബിഡി വിഭാഗങ്ങളില്‍പ്പെടുന്നവര്‍ക്ക് അഞ്ച് ശതമാനം മാര്‍ക്കിളവുണ്ട്. അവസാനവര്‍ഷ പരീക്ഷയെഴുതി ഫലം കാത്തിരിക്കുന്നവര്‍ക്കും അപേക്ഷിക്കാം.

വിശദ വിവരങ്ങളടങ്ങിയ പ്രവേശന വിജ്ഞാപനം https://www.iiitm.ac.in/index.php/en/admissions-final/admission-for-mba ലിങ്കില്‍ നിന്നും ഡൗണ്‍ലോഡ് ചെയ്യാം.

വനിതകള്‍, എസ്.സി, എസ്.ടി, പി.എച്ച് വിഭാഗങ്ങളില്‍ ഉള്‍പ്പെടുന്നവര്‍ക്ക് 500 രൂപ അപേക്ഷ ഫീസുണ്ട്.

അപേക്ഷ ഫോറത്തിന്റെ മാതൃക വെബ്‌സൈറ്റിലുണ്ട്. കൂടുതല്‍ വിവരങ്ങള്‍ക്കും അന്വേഷണങ്ങള്‍ക്കുമായി [email protected] എന്ന ഇ-മെയിലില്‍ ബന്ധപ്പെടാവുന്നതാണ്. ഫോണ്‍: 86950029224. അപേക്ഷ ലഭിക്കേണ്ട അവസാന തീയതി മാര്‍ച്ച് 30.