'കശ്മീരിന്റെ പ്രത്യേക പദവി എടുത്തു കളഞ്ഞതിനെ വിമര്‍ശിക്കുന്നതും പാകിസ്താന് സ്വാതന്ത്ര്യദിനാശംസ നേരുന്നതും ക്രിമിനല്‍ കുറ്റമല്ല' സുപ്രിം കോടതി

ന്യൂഡല്‍ഹി: ജമ്മു കശ്മീരിന്റെ പ്രത്യേക ഭരണഘടനാ പദവി എടുത്തു കളഞ്ഞതിനെ വിമര്‍ശിക്കുന്നതും പാകിസ്താന് സ്വാതന്ത്ര്യദിനാശംസ നേരുന്നതും ക്രിമിനല്‍ കുറ്റമല്ലെന്ന് സുപ്രിംകോടതി. സര്‍ക്കാര്‍ തീരുമാനങ്ങള്‍ക്കെതിരെ സമാധാനപരമായി പ്രതിഷേധിക്കാനുള്ള അവകാശം രാജ്യത്തെ ഓരോ പൗരനുമുണ്ടെന്നും കോടതി വ്യക്തമാക്കി. കശ്മീരിന്റെ പ്രത്യേക പദവി എടുത്തു കളഞ്ഞത് കരിദിനമാണെന്ന് ചൂണ്ടിക്കാട്ടി വാട്‌സ്ആപ്പ് സ്റ്റാറ്റസ് വച്ചതില്‍ കോളജ് പ്രൊഫസര്‍ക്കെതിരെ രജിസ്റ്റര്‍ ചെയ്ത എഫ്‌ഐആര്‍ പരിഗണിക്കവെയാണ് കോടതി നിരീക്ഷണം.

'ജമ്മു കശ്മീരിന് പ്രത്യേക പദവി ഉറപ്പുനല്‍കിയ ഭരണഘടനയുടെ 370ാം വകുപ്പ് എടുത്തുകളഞ്ഞതിനെ വിമര്‍ശിക്കാന്‍ ഇന്ത്യയിലെ ഓരോ പൗരനും അവകാശമുണ്ട്. ഓരോ വിമര്‍ശനവും ശിക്ഷാനിയമത്തിലെ 153എ(വിവിധ മത സമുദായങ്ങള്‍ക്കിടയില്‍ സ്പര്‍ദ്ധ വളര്‍ത്തല്‍) ക്ക് കീഴില്‍ വരുന്ന കുറ്റമായി കണക്കാക്കുകയാണ് എങ്കില്‍ ജനാധിപത്യം നിലനില്‍ക്കില്ല. നിയമപരമായി വിയോജിക്കാനുള്ള അവകാശം മൗലികമാണ്. വിയോജിക്കാനുള്ള അവകാശം മാനിക്കപ്പെടണം. സര്‍ക്കാര്‍ തീരുമാനങ്ങള്‍ക്കെതിരെ സമാധാനപരമായി പ്രതിഷേധിക്കാനുള്ള അവസരം ജനാധിപത്യത്തിന്റെ അവിഭാജ്യഘടകമാണ്. അത് ഭരണഘടന ഉറപ്പുനല്‍കുന്നതുമാണ്.' ജസ്റ്റിസ് അഭയ് എസ് ഓക, ഉജ്ജല്‍ ഭുയാന്‍ എന്നിവരടങ്ങുന്ന ബെഞ്ച് വ്യക്തമാക്കി.

അതോടൊപ്പം പാകിസ്താന്‍ അടക്കമുള്ള ഏതു രാഷ്ട്രങ്ങളുടെയും സ്വാതന്ത്ര്യദിനത്തില്‍ ആശംസ അറിയിക്കുന്നതില്‍ തെറ്റില്ലെന്ന് കോടതി പ്രത്യേകം എടുത്തുപറഞ്ഞു. 'അവരവരുടെ സ്വാതന്ത്ര്യദിനത്തില്‍ ആ രാഷ്ട്രത്തിലെ പൗരന്മാര്‍ക്ക് ആശംസ അറിയിക്കാന്‍ ഓരോ പൗരനും അവകാശമുണ്ട്. ആഗസ്ത് 14ന് പാകിസ്താന് സ്വാതന്ത്ര്യദിനാംശ നേരുന്നതു കൊണ്ട് ഒരു പ്രശ്‌നവുമില്ല. അത് സൗമനസ്യത്തിന്റെ പ്രകടനമാണ്. ഇത്തരം കേസുകളില്‍ അത് വിവിധ മതവിഭാഗങ്ങള്‍ക്കിടയില്‍ സ്പര്‍ദ്ധയുണ്ടാക്കും എന്ന് കരുതേണ്ടതില്ല.' ബഞ്ച് നിരീക്ഷിച്ചു.

കശ്മീരിന്റെ പ്രത്യേക പദവി എടുത്തുകളഞ്ഞ ദിവസം കരിദിനം (ബ്ലാക് ഡേ) ആണെന്ന് വാട്‌സ് ആപ് സ്റ്റാറ്റസ് വെച്ച കശ്മീരി പ്രൊഫസര്‍ ജാവേദ് അഹ്മദ് ഹജമിനെതിരെയുള്ള കേസാണ് കോടതി പരിഗണിച്ചത്. 152 എ വകുപ്പ് പ്രകാരം മഹാരാഷ്ട്ര പൊലിസാണ് ഹജമിനെതിരെ കേസ് രജിസ്റ്റര്‍ ചെയ്തിരുന്നത്. കോലാപൂരിലെ സഞ്ജയ് ഘോദാവദ് കോളജ് അധ്യാപകനാണ് ഇദ്ദേഹം. കേസ് ആദ്യം പരിഗണിച്ച ബോംബെ ഹൈക്കോടതി എഫ്‌ഐആര്‍ റദ്ദാക്കാന്‍ വിസമ്മതിച്ചിരുന്നു. ഇതിന് പിന്നാലെയാണ് പ്രൊഫസര്‍ സുപ്രിം കോടതിയെ സമീപിച്ചത്. എഫ്‌ഐആര്‍ സുപ്രിംകോടതി റദ്ദാക്കി.