തിരുവനന്തപുരം: ഭരണഘടന പദവിയിലിരിക്കുന്ന ഒരാളെ ചോദ്യം ചെയ്യാന്‍ വിളിപ്പിച്ച കസ്റ്റംസ് നടപടി തെറ്റാണെന്നും കസ്റ്റംസ് ചോദ്യം ചെയ്യാന്‍ വിളിപ്പിച്ചതിന്റെ പേരില്‍ സ്പീക്കര്‍ പി. ശ്രീരാമകൃഷ്ണന്‍ രാജിവയ്ക്കണമെന്ന പ്രതിപക്ഷ നേതാവ് രമേശ് ചെന്നിത്തലയുടെ പരാമര്‍ശത്തോട്് യോജിപ്പില്ലെന്നും മുതിര്‍ന്ന കോണ്‍ഗ്രസ് നേതാവ് പി.ജെ കുര്യന്‍പറഞ്ഞു.
കസ്റ്റഡിയിലിരിക്കുന്ന ഒരു പ്രതിയുടെ മൊഴിയുടെ പേരില്‍ മാത്രം ഭരണഘടനാ പദവിയിലിരിക്കുന്ന ഒരാളെ ചോദ്യം ചെയ്യാന്‍ നോട്ടീസയച്ച് വിളിച്ച് വരുത്തുന്ന രീതി ശരിയല്ല. അതന്വേഷിച്ച് തെളിവുകള്‍ ശേഖരിച്ച് കഴമ്പുണ്ടെങ്കില്‍ മാത്രം വിവരം സ്പീക്കറെ അറിയിക്കുകയാണ് വേണ്ടിയിരുന്നത്. തുടര്‍ന്ന് അന്വേഷണത്തിന് അദ്ദേഹത്തിന്റെ സഹകരണം തേടുകയാണ് വേണ്ടത്. ആ ഘട്ടത്തില്‍ അദ്ദേഹത്തിന് സ്പീക്കര്‍ പദവിയിലിരിക്കുക ബുദ്ധിമുട്ടാകും.

എന്നാല്‍ പ്രതി നല്‍കിയ മൊഴിയുടെ അടിസ്ഥാനത്തില്‍ ഭരണഘടനാ സ്ഥാപനത്തിലിരിക്കുന്ന ആരേയും ചോദ്യം ചെയ്യാമെന്നത് ശരിയല്ല. കസ്റ്റഡിയിലിരിക്കുന്ന ഒരാളുടെമൊഴി പൂര്‍ണമായും വിശ്വസിക്കാന്‍ കഴിയില്ല. അതിന്റെ പേരില്‍ സ്പീക്കര്‍ പദവി രാജിവയ്ക്കണമെന്ന് പറയുന്നതിനോട് താന്‍ യോജിക്കുന്നില്ലെന്നും കുര്യന്‍ വ്യക്തമാക്കി.