മട്ടന്നൂര്‍: കണ്ണൂര്‍ വിമാനത്താവളത്തില്‍ രണ്ടു യാത്രക്കാരില്‍ നിന്നായി 85 ലക്ഷത്തിലധികം രൂപയുടെ സ്വര്‍ണം കസ്റ്റംസ് പിടികൂടി. 

വ്യാഴാഴ്ച ദുബൈയില്‍ നിന്നെത്തിയ ശ്രീകണ്ഠപുരം സ്വദേശി സബീര്‍ മൈക്കാരനില്‍ നിന്നും വെള്ളിയാഴ്ച നാദാപുരം സ്വദേശി ആഷിഖില്‍ നിന്നുമാണ് സ്വര്‍ണം പിടികൂടിയത്. സബീറില്‍ നിന്ന് 1,038 ഗ്രാം സ്വര്‍ണമാണ് പിടിച്ചത്. ഇതിന് 52,98,990 രൂപ വിലവരും. ആഷിഖില്‍ നിന്ന് പിടിച്ച 676 ഗ്രാം സ്വര്‍ണത്തിന് 32,56,990 രൂപ വിലവരും. രണ്ടു പേരും മിശ്രിത രൂപത്തിലുള്ള സ്വര്‍ണം ഗുളിക രൂപത്തിലാക്കി ശരീരത്തിനുള്ളില്‍ ഒളിപ്പിച്ചാണ് കടത്താനാണ് ശ്രമിച്ചത്.