കോഴിക്കോട്; സി.പി.ഐ ജില്ലാ കൗണ്‍സില്‍ യോഗത്തില്‍ പങ്കെടുക്കാതെ സംസ്ഥാന സെക്രട്ടറി കാനം രാജേന്ദ്രന്‍ കൈതപ്പൊയിലിലെ മര്‍കസ് നോളജ് സിറ്റി സന്ദര്‍ശിച്ചതിനെച്ചൊല്ലി സി.പി.ഐയില്‍ വിവാദം.
നോളജ് സിറ്റി നിര്‍മാണത്തിനായി തോട്ടഭൂമി തരംമാറ്റിയെന്ന ആരോപണത്തില്‍ റവന്യൂ വകുപ്പിന്റെ അന്വേഷണം നടക്കുന്നതിനിടെയാണ് കാനം നോളജ് സിറ്റിയിലെത്തിയത്. രണ്ടുദിവസത്തെ പരിപാടികള്‍ക്കായി കോഴിക്കോട്ടെത്തിയ കാനം രാജേന്ദ്രന്‍ വെള്ളിയാഴ്ച രാവിലെ സി.പി.ഐ ജില്ലാ കൗണ്‍സില്‍ യോഗത്തില്‍ പങ്കെടുക്കുമെന്നായിരുന്നു വിവരം. യോഗത്തിനായി മുതിര്‍ന്ന നേതാക്കളായ സത്യന്‍ മൊകേരിയും സി.എന്‍ ചന്ദ്രനുമെത്തി.
എന്നാല്‍ യോഗത്തില്‍ പങ്കെടുക്കാതെ കാനം നേരെ പോയത് നോളജ് സിറ്റിയിലേക്കാണ്. നോളജ് സിറ്റിക്കായി തോട്ടഭൂമി തരം മാറ്റിയതു സംബന്ധിച്ച് കലക്ടര്‍ പ്രഖ്യാപിച്ച അന്വേഷണം നടക്കുന്നതിനിടെ കാനം ഇവിടെ സന്ദര്‍ശിക്കുന്നതില്‍ സി.പി.ഐ പ്രാദേശിക ഘടങ്ങള്‍ എതിര്‍പ്പ് അറിയിച്ചിരുന്നു. ഇക്കാര്യത്തെക്കുറിച്ച് കഴിഞ്ഞ ദിവസം കാനത്തോട് ചോദിച്ചപ്പോള്‍ സന്ദര്‍ശന കാര്യത്തില്‍ തീരുമാനമെടുത്തിട്ടില്ലെന്നും തല്‍ക്കാലം പോകുന്നില്ലെന്നുമായിരുന്നു മറുപടി.
എന്നാല്‍ പ്രതികരണം നല്‍കിയതിന്റെ മണിക്കൂറുകള്‍ക്കകം നോളജ് സിറ്റി അധികൃതര്‍ അയച്ച കാറില്‍ കയറി കാനം ചടങ്ങിനെത്തുകയായിരുന്നു. തിടുക്കപ്പെട്ട് കാനം അവിടെയെത്തിയത് റവന്യൂ വകുപ്പില്‍ ഇടപെടാനും വിവാദ ഭൂമിക്ക് സഹായം നല്‍കാനുമാണെന്ന ആക്ഷേപമാണ് സി.പി.ഐയില്‍ ഉയരുന്നത്. മര്‍ക്കസ് യുനാനി മെഡിക്കല്‍ കോളജിലെ അവാര്‍ഡ് ദാന ചടങ്ങിലാണ് കാനം പങ്കെടുത്തത്. ചടങ്ങ് കഴിഞ്ഞതിനുപിന്നാലെ നോളജ് സിറ്റി അധികൃതര്‍ പരിപാടിയില്‍ കാനം പ്രസംഗിക്കുന്നതിന്റെ ചിത്രമടക്കം മാധ്യമങ്ങള്‍ക്ക് വാര്‍ത്ത നല്‍കി.
തിരികെയെത്തിയ കാനം തിരുവനന്തപുരത്തേക്ക് മടങ്ങി. പാര്‍ട്ടി സമ്മേളനങ്ങള്‍ക്കുമുന്നോടിയായുളള പ്രധാന യോഗം ഒഴിവാക്കി, റവന്യൂ വകുപ്പിന്റെ അന്വേഷണം നേരിടുന്ന ഒരു സ്ഥാപനത്തില്‍ സംസ്ഥാന സെക്രട്ടറി സന്ദര്‍ശനം നടത്തിയതില്‍ ജില്ലാ നേതൃത്വത്തിന് കടുത്ത അമര്‍ഷമുണ്ട്.