ശ്രീനഗര്‍: മണ്ഡല പുനര്‍നിര്‍ണയത്തില്‍ പ്രതിഷേധം ഭയന്ന് ജമ്മു കശ്മിരിലെ മൂന്ന് മുന്‍ മുഖ്യമന്ത്രിമാരെ വീട്ടുതടങ്കലിലാക്കി. അതിസുരക്ഷാ മേഖലയായ ശ്രീനഗറിലെ ഗുപ്കര്‍ റോഡിലാണ് മുന്‍ മുഖ്യമന്ത്രിമാരായ ഫാറൂഖ് അബ്ദുല്ല, മെഹ്ബൂബ മുഫ്തി, ഒമര്‍ അബ്ദുല്ല എന്നിവരെ വീട്ടുതടങ്കലിലാക്കിയത്.
ഇവരുടെ വീടുകള്‍ക്കു മുന്നില്‍ പൊലിസ് പിക്കറ്റിങ് ഏര്‍പ്പെടുത്തി. ആരെയും അകത്തേക്ക് പോകാനോ പുറത്തുപോകാനോ അനുവദിക്കുന്നില്ല. ജമ്മു കശ്മിരിലെ നിയമസഭാ മണ്ഡലങ്ങളുടെ പുനര്‍നിര്‍ണയത്തിന് കമ്മിഷനെ ചുമതലപ്പെടുത്തിയിട്ടുണ്ട്.

ഇതിനെതിരേ ഫാറൂഖ് അബ്ദുല്ല പ്രക്ഷോഭത്തിന് ആഹ്വാനം ചെയ്തിരുന്നു. ജമ്മു പ്രവിശ്യയില്‍ ആറു പുതിയ മണ്ഡലങ്ങള്‍ ഉണ്ടാക്കണമെന്നാണ് കമ്മിഷന്‍ മുന്നോട്ടുവച്ച നിര്‍ദേശം. ജനസംഖ്യാനുപാതം ക്രമീകരിക്കാനാണിതെന്ന് കമ്മിഷന്‍ പറയുന്നു. ജമ്മു മേഖലയില്‍ ആറു സീറ്റുകള്‍ വര്‍ധിപ്പിക്കുമ്പോള്‍ കശ്മിരില്‍ ഒരു സീറ്റ് വര്‍ധിപ്പിക്കാനാണ് കമ്മിഷന്‍ ശുപാര്‍ശ ചെയ്തത്. ഫാറൂഖ് അബ്ദുല്ലയുടെ നേതൃത്വത്തിലുള്ള ഗുപ്കര്‍ സഖ്യമാണ് ഇതിനെതിരേ പ്രതിഷേധവുമായി രംഗത്തുള്ളത്. പിന്‍വാതിലിലൂടെ അധികാരം പിടിക്കാനുള്ള തന്ത്രമാണിതെന്ന് പ്രതിപക്ഷവും രാഷ്ട്രീയ നിരീക്ഷകരും പറയുന്നു. പുതുവത്സര ദിനത്തില്‍ തന്റെ വീടിനു മുമ്പില്‍ സുരക്ഷാസൈനികര്‍ തമ്പടിച്ച ചിത്രം ഒമര്‍ അബ്ദുല്ല ട്വീറ്റ് ചെയ്തിരുന്നു.