ഹരിപ്പാട്: അനധികൃതമായി കടത്തിക്കൊണ്ടുവന്ന 1,88,16,930 രൂപ കായംകുളം എക്‌സൈസ് റേയ്ഞ്ച് സംഘം പിടികൂടി. ഞായറാഴ്ച രാത്രി പത്തരയോടെ നടത്തിയ വാഹന പരിശോധനയ്ക്കിടെയാണ് ഹരിപ്പാട് മാധവ ജങ്ഷന് സമീപത്തുനിന്നു മാരുതി സ്വിഫ്റ്റ് കാറില്‍ കടത്തിക്കൊണ്ടുവന്ന പണം കായംകുളം എക്‌സൈസ് റേഞ്ച് ഇന്‍സ്‌പെക്ടര്‍ എസ്. അനിര്‍ഷയുടെ നേതൃത്വത്തില്‍ പിടികൂടിയത്.

വാഹനത്തിന്റെ മാറ്റിനടിയിലും, വാഹനത്തിലുണ്ടായിരുന്നവര്‍ ധരിച്ചിരുന്ന വസ്ത്രങ്ങളുടെ ഉള്ളില്‍ അറകള്‍ ഉണ്ടാക്കിയുമാണ് പണം സൂക്ഷിച്ചിരുന്നത്. വാഹനത്തിലുണ്ടായിരുന്ന കൊല്ലം താമരക്കുളം സീതാറാംനിവാസ് വീട്ടില്‍ ദീപക്, കൊല്ലം കല്ലുംതാഴത്ത് വരയാല്‍ വിളച്ചിറയില്‍ രാജേഷ്, കാര്‍ത്തികപ്പള്ളി ഹരിപ്പാട് പിലാപ്പുഴ മുറിയില്‍ ദ്വാരക നിവാസില്‍ അതുല്‍, കായംകുളം ചിറക്കടവം പ്രശാന്ത് ഭവനത്തില്‍ പ്രശാന്ത് എന്നിവരാണ് പിടിയിലായത്.

വാഹന പരിശോധനയില്‍ എക്‌സൈസ് ഇന്‍സ്‌പെക്ടര്‍ എസ്. അനിര്‍ഷയോടൊപ്പം പ്രിവന്റീവ് ഓഫിസര്‍ ജെ. കൊച്ചുകോശി, ഗ്രേഡ് പ്രിവന്റീവ് ഓഫിസര്‍ പി.ആര്‍ ബൈജു, സിവില്‍ എകെ്‌സെസ് ഓഫിസര്‍മാരായ റഫീഖ്, കെ.എച്ച് ഹരീഷ് കുമാര്‍, അരുണ്‍, എക്‌സൈസ് ഡ്രൈവര്‍ പ്രദീപ് പങ്കെടുത്തു.

പിടികൂടിയ കള്ളപ്പണവും പ്രതികളേയും ഹരിപ്പാട് പൊലിസിന് കൈമാറി.