കൊച്ചി:ഡോളര്‍ക്കടത്ത് കേസില്‍ സ്പീക്കര്‍ പി ശ്രീരാമകൃഷ്ണന്റെ അസിസ്റ്റന്റ് പ്രൈവറ്റ് സെക്രട്ടറി കെ.അയ്യപ്പന്‍ ഇന്നും ചോദ്യം ചെയ്യലിന് ഹാജരാകില്ല. നിയമസഭ സമ്മേളനം എട്ടിന് തുടങ്ങുന്നതിനാല്‍, തിരക്കുകളുണ്ടെന്നും ഓഫിസില്‍ നിന്നും മാറി നില്‍ക്കാന്‍ കഴിയില്ലെന്നും അയ്യപ്പന്‍ കസ്റ്റംസ് പ്രിവന്റീവ് വിഭാഗത്തിന്റെ നോട്ടിസിന് മറുപടി നല്‍കി. ചോദ്യം ചെയ്യലിന് പുതിയ തിയ്യതിയും ആവശ്യപ്പെട്ടിട്ടുണ്ട്.

ഇന്ന് കൊച്ചിയിലെ ഓഫിസില്‍ പത്ത് മണിയ്ക്ക് ചോദ്യം ചെയ്യലിന് ഹാജരാകാനാണ് ആവശ്യപ്പെട്ടിരുന്നത്. സ്വര്‍ണക്കടത്ത് കേസിലെ പ്രതികളായ സ്വപ്ന സുരേഷിനും സരിത്തിനും തിരുവനന്തപുരത്തെ ഒരു ഫ്‌ളാറ്റില്‍വെച്ച് ഡോളര്‍ അടങ്ങിയ ബാഗ് വിദേശത്തേക്ക് അയക്കാന്‍ കൈമാറി എന്ന വാര്‍ത്ത പുറത്തുവന്നിരുന്നു. ഈ ബാഗ് കോണ്‍സുലേറ്റ് ജനറല്‍ ഓഫിസില്‍ നല്‍കാനായിരുന്നു സ്പീക്കര്‍ നിര്‍ദേശിച്ചതെന്നും അതനുസരിച്ച് ബാഗ് കോണ്‍സുലേറ്റ് ഓഫിസില്‍ നല്‍കി എന്നുമായിരുന്നു സ്വപ്നയും സരിത്തും നല്‍കിയ മൊഴി. ഇതിന് പിന്നാലെയാണ് അസി. പ്രൈവറ്റ് സെക്രട്ടറിയോട് ഹാജരാകാന്‍ കസ്റ്റംസ് നിര്‍ദേശിച്ചത്.

ഇന്നലെ കെ. അയ്യപ്പനോട് ചോദ്യം ചെയ്യലിന് ഹാജരാകാന്‍ കസ്റ്റംസ് ഫോണില്‍ ആവശ്യപ്പെട്ടിരുന്നുവെങ്കിലും ഹാജരായിരുന്നില്ല. തനിക്ക് കസ്റ്റംസ് നോട്ടിസ് ലഭിച്ചിട്ടില്ലെന്നും ഫോണില്‍ വിളിക്കുക മാത്രമാണ് ചെയ്തതെന്നും അയ്യപ്പന്‍ വ്യക്തമാക്കിയിരുന്നു. ഈ സാഹചര്യത്തിലാണ് കസ്റ്റംസ് രേഖാമൂലം നോട്ടിസ് നല്‍കിയത്. സ്പീക്കറുടെ പരിപാടികള്‍ നിയന്ത്രിക്കുന്നതും യാത്രാ രേഖകള്‍ കൈകാര്യം ചെയ്യുന്നതിന്റെയും ചുമതല അയ്യപ്പനാണ്.

മൂന്നാമത്തെ നോട്ടിസ് നല്‍കിയ ശേഷവും ഹാജരായില്ലെങ്കില്‍ വാറണ്ട് അടക്കമുള്ള നടപടികളിലേക്കാകും കസ്റ്റംസ് കടക്കുക.