അബ്ദുസ്സലാം കൂടരഞ്ഞി
റിയാദ്
ഹജ്ജ് നടപടികൾ ലംഘിക്കുന്നവരെ തടയാൻ ലക്ഷ്യമിട്ട് ശിക്ഷ നടപടികൾ ശക്തമാക്കി. അനുമതിയില്ലാതെ ഹജ്ജ് നിർവഹിക്കുന്നവർക്കും പുണ്യ സ്ഥലങ്ങളിൽ പ്രവേശിക്കുന്നവർക്കും കടുത്ത ശിക്ഷ നൽകുന്നതടക്കമുള്ള ഹജ്ജ് ചട്ടങ്ങൾ ലംഘിക്കുന്നവർക്കുള്ള വ്യവസ്ഥകളുടെയും പിഴകളുടെയും കരട് നയം ആഭ്യന്തര മന്ത്രാലയം പുറത്തിറക്കി. ഹജ്ജ് നടപടികൾ ലംഘിക്കുന്നവർക്കെതിരേ തടവ്, കനത്ത പിഴ, നാടുകടത്തൽ തുടങ്ങിയവ ഉൾപ്പെടെയുള്ള ശിക്ഷ നടപടികളാണ് ശക്തമാക്കുക.
അനുവാദമില്ലാതെ മിന, മുസ്ദലിഫ, അറഫാത്ത് തുടങ്ങിയ പുണ്യസ്ഥലങ്ങളിൽ പ്രവേശിക്കുന്ന ജിസിസി അംഗ രാജ്യങ്ങളിൽ നിന്നുള്ളവർക്ക് 15,000 റിയാൽ പിഴ ചുമത്തും. ആ വർഷം അദ്ദേഹം തീർഥാടനം നടത്തിയതായും രേഖപ്പെടുത്തും. കുറ്റം ആവർത്തിച്ചാൽ മുൻ സീസണിൽ ഏർപ്പെടുത്തിയ പിഴകൾ ഇരട്ടിയാക്കും. വിശുദ്ധ നഗരമായ മക്കയിലേക്കും പുണ്യ സ്ഥലങ്ങളിലേക്കും റുസൈഫയിലെ ഹറമൈൻ ട്രെയിൻ സ്‌റ്റേഷനിലേക്കും അനുമതിയില്ലാതെ പ്രവേശിച്ചാൽ 10,000 റിയാൽ പിഴ ചുമത്തും. ഈ രണ്ട് ലംഘനങ്ങളുമായി ബന്ധപ്പെട്ട പിഴകൾ ഓരോ വർഷവും ദുൽഖഅദയുടെ 28-ാം തീയതി മുതൽ നടപ്പാക്കപ്പെടും. ഈ രണ്ട് ലംഘനങ്ങളിലൊന്ന് മൂന്നാം തവണയും ആവർത്തിക്കുന്ന സാഹചര്യത്തിൽ, ലംഘിക്കുന്നയാൾക്ക് ഒരു മാസത്തിൽ കുറയാത്തതും ആറ് മാസത്തിൽ കൂടാത്തതുമായ തടവ് അടക്കമുള്ള നടപടിയെടുക്കാനും അദ്ദേഹത്തെ പബ്ലിക് പ്രോസിക്യൂഷന് റഫർ ചെയ്യും.