ന്യൂഡല്‍ഹി: രാജ്യത്ത് വിതരണത്തിനുള്ള കൊവിഡ് പ്രതിരോധ വാക്സിനുകള്‍ ഇന്നോ നാളെയോ വിവിധ കേന്ദ്രങ്ങളിലേക്ക് എത്തുമെന്ന് റിപ്പോര്‍ട്ട്. വാക്സിനുകള്‍ എത്തിക്കുന്നതിനായി വിമാനങ്ങള്‍ സര്‍ക്കാര്‍ അനുവദിച്ചിട്ടുണ്ടെന്നും എ.എന്‍. ഐ റിപ്പോര്‍ട്ട് ചെയ്തു. വിവിധ കേന്ദ്രങ്ങളില്‍ വാക്‌സിന്‍ എത്തിക്കുന്നതിന് വിശദമായ പദ്ധതി ആസൂത്രണം ചെയ്തതായും സര്‍ക്കാര്‍ വൃത്തങ്ങള്‍ അറിയിച്ചു.

കൊവിഡ് വാക്സിന്‍ വിതരണത്തിന്റെ പ്രധാന കേന്ദ്രം പുണെ ആയിരിക്കും. രാജ്യത്തുടനീളം 41 കേന്ദ്രങ്ങളിലേക്കുള്ള വാക്സിനുകള്‍ പുണെയില്‍ നിന്നാകും എത്തുക.
ഉത്തരേന്ത്യയില്‍ ഡല്‍ഹിയും കര്‍ണാലും മിനി ഹബ്ബുകളാക്കും. കിഴക്കന്‍ മേഖലയില്‍ കൊല്‍ക്കത്തയും, വടക്കു കിഴക്കന്‍ മേഖലയില്‍ ഗുവാഹത്തിയും ദക്ഷിണേന്ത്യയില്‍ ചെന്നൈയും ഹൈദരാബാദുമായിരിക്കും പ്രധാന കേന്ദ്രങ്ങളെന്നും സര്‍ക്കാര്‍ വൃത്തങ്ങള്‍ പറയുന്നു.
വാക്‌സിന്‍ വിതരണത്തിന് മുന്നോടിയായി സംസ്ഥാനങ്ങളിലെ മുഖ്യമന്ത്രിമാരുടെയും കേന്ദ്ര ആഗോഗ്യ, വ്യോമയാന മന്ത്രിമാരുടെയും യോഗം നടന്നു.

ഉത്തര്‍പ്രദേശിലും ഹരിയാണയിലുമൊഴികെ രാജ്യത്തെ എല്ലാ ജില്ലകളിലും നാളെ കോവിഡ് വാക്സിന്‍ ഡ്രൈ റണ്‍ നടത്തും. ജനുവരി അഞ്ചിന് ഉത്തര്‍പ്രദേശിലുടനീളം ഡ്രൈ റണ്‍ നടത്തിയതാണ്. ഹരിയാണയില്‍ ഇന്നും നടക്കുന്നു. ജില്ലാ ആശുപത്രികള്‍, മെഡിക്കല്‍ കോളേജുകള്‍ സ്വകാര്യ ആരോഗ്യ കേന്ദ്രങ്ങള്‍ മറ്റു തിരഞ്ഞെടുക്കപ്പെട്ട കേന്ദ്രങ്ങള്‍ എന്നിവിടങ്ങളിലാകും ഡ്രൈ റണ്‍ നടത്തുക.

1.7 ലക്ഷത്തോളം വാക്സിനേറ്റര്‍മാര്‍ക്കും മൂന്ന് ലക്ഷം വാക്സിനേഷന്‍ ടീം അംഗങ്ങള്‍ക്കും വാക്സിനേഷന്‍ കേന്ദ്രങ്ങളില്‍ പിന്തുടരേണ്ട നടപടിക്രമങ്ങളെക്കുറിച്ച് പരിശീലനം നല്‍കിയിട്ടുണ്ട്.