ന്യൂയോര്‍ക്ക്: അമേരിക്കയിലെ കാപിറ്റോള്‍ കലാപത്തില്‍ പ്രത്യക്ഷപ്പെട്ട ഇന്ത്യന്‍ പതാകയുടെ ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. തെമ്മാടികള്‍ക്കൊപ്പം ഇന്ത്യന്‍ പതാകയേന്തിയതിനെതിരേ കടുത്ത വിമര്‍ശനമാണ് ഉയര്‍ന്നത്. ആ പതാകയേന്തിയ കൈകള്‍ ആരുടേതെന്ന് ഇപ്പോള്‍ വ്യക്തമായിരിക്കുകയാണ്. മലയാളിയായ വൈറ്റില ചമ്പക്കര സ്വദേശി വിന്‍സെന്റ് സേവ്യര്‍ പാലത്തിങ്ങലായിരുന്നു അത്. താന്‍ കാപിറ്റോള്‍ അക്രമത്തില്‍ പങ്കാളിയല്ലെന്നും ട്രംപിനുള്ള ഇന്ത്യന്‍ വംശജരുടെ പിന്തുണ അറിയിക്കാനാണ് പതാക വീശിയതെന്നും അദ്ദേഹം മാധ്യമങ്ങളോടു പറഞ്ഞു.

താന്‍ റിപ്പബ്ലിക്കന്‍ പാര്‍ട്ടി വെര്‍ജീനിയ സംസ്ഥാന കേന്ദ്ര കമ്മിറ്റി അംഗമായിരുന്നെന്നും അദ്ദേഹം പറയുന്നു. എന്നാല്‍ കടുത്ത വംശീയവാദികളോടൊപ്പം ഇന്ത്യന്‍ പതാകയുമായി ഒരാള്‍ പങ്കെടുത്തതിനെതിരേ കടുത്ത വിമര്‍ശനമാണ് ഉയരുന്നത്.
എറണാകുളം ജില്ലയിലെ കുമ്പളത്ത് ജനിച്ച വിന്‍സെന്റ് യു.എസിലെ റെനോ യൂനിവേഴ്‌സിറ്റിയില്‍ സിവില്‍ എന്‍ജിനിയറിങ്ങിനു പഠിക്കാനാണ് അവിടേക്കു പോയത്. ഐ.ടി ബിസിനസ് ചെയ്യുന്ന അദ്ദേഹം നിലവില്‍ മലയാളി സംഘടനയായ ഫോമ വൈസ് പ്രസിഡന്റാണ്. 2015ലാണ് റിപ്പബ്ലിക്കന്‍ പാര്‍ട്ടി അംഗമായത്. കേരളത്തിലായിരിക്കെ ഇയാള്‍ കമ്മ്യൂണിസ്റ്റ് വിരുദ്ധനായിരുന്നുവെന്നും വിന്‍സെന്റിന്റെ വെബ്‌സൈറ്റില്‍ പറയുന്നു.

അതേസമയം കാപിറ്റോള്‍ മന്ദിരത്തില്‍ കയറി തെരഞ്ഞെടുപ്പ് ഫലം അട്ടിമറിക്കാന്‍ ശ്രമിച്ച കലാപകാരികള്‍ക്കൊപ്പം ബ്രൗഡ് ബോയ്‌സ്, ഓത് കീപ്പേഴ്‌സ്, ക്യുഅനോന്‍ എന്നീ വംശീയവാദി സംഘടനക്കാരുമുണ്ടായിരുന്നതായി തെളിഞ്ഞു. ക്യുഅനോന്‍ നേതാവ് ജെയ്ക് ഏന്‍ജലാണ് ഇതില്‍ പ്രധാനി. ഇയാള്‍ കാളക്കൊമ്പുകള്‍ തലയില്‍വച്ച് കുന്തത്തിനു മുകളില്‍ കുത്തിയ ദേശീയ പതാകയുമായി സെനറ്റ് ചേംബറിനു മുകളില്‍ നിന്ന് പൊലിസിനെ വെല്ലുവിളിക്കുന്ന ചിത്രം വൈറലായിരുന്നു. അക്രമികളെ നേരിടുന്നതിനിടെ കൊല്ലപ്പെട്ട വനിതയും ക്യുഅനോന്‍ അംഗമാണ്.