പൊന്നാനി: പൊതുവിദ്യാലയങ്ങളിലെ വായനാമുറികളെ ബജറ്റ് തഴഞ്ഞതോടെ നിയമനം കാത്തിരിക്കുന്ന പൊതുവിദ്യാലയങ്ങളിലെ ലൈബ്രേറിയന്മാര്‍ പെരുവഴിയിലായി. ലൈബ്രേറിയന്‍ നിയമനം കാത്ത് 1500 ല്‍ പരം സ്‌കൂള്‍ ലൈബ്രേറിയന്മാരാണ് ഇതോടെ നിരാശരായത്. ലൈബ്രറി സയന്‍സ് കോഴ്‌സ് പഠിച്ചത് എന്തിനെന്ന ചോദ്യവുമായി നൂറുകണക്കിന് പഠിതാക്കള്‍ സര്‍ക്കാരിന്റെ പിടിപ്പുകേടിനെ വിമര്‍ശിക്കുകയാണ്.
സംസ്ഥാനത്തെ പൊതുവിദ്യാഭ്യാസ മേഖലയിലെ ഹയര്‍സെക്കന്‍ഡറി സ്‌കൂളുകളില്‍ ലൈബ്രേറിയന്‍ തസ്തിക സൃഷ്ടിച്ചുകൊണ്ടു 2001 ല്‍ സ്‌പെഷല്‍ റൂള്‍ ഉത്തരവിറങ്ങിയിട്ടും നാളിതുവരെയായിട്ടും ഒരു നിയമനം നടത്തിയിട്ടില്ല.

കോളജുകളില്‍നിന്നും പ്രീഡിഗ്രി വേര്‍പ്പെടുത്തി 1991 ലാണ് ഹയര്‍ സെക്കന്‍ഡറി ആരംഭിച്ചത്. ഇതേ തുടര്‍ന്ന് 09.11.2001 ലെ സെപ്ഷല്‍ റൂളിലാണ് ഹയര്‍സെക്കന്‍ഡറി സ്‌കൂളുകളില്‍ ഗ്രേഡ് മൂന്നിലും നാലിലുമുള്ള ലൈബ്രേറിയന്‍മാര നിയമിക്കണമെന്ന നിര്‍ദ്ദേശമുണ്ടായത്. എന്നിട്ടും മാറിമാറി വന്നിട്ടുള്ള സര്‍ക്കാരുകള്‍ സാമ്പത്തിക ബാധ്യത ചൂണ്ടിക്കാണിച്ച് ഈ തസ്തികയിലേക്കുള്ള നിയമനം അനന്തമായി നീട്ടിക്കൊണ്ടുപോവുകയാണെന്നാണ് ആക്ഷേപം.

പിന്നീട് പൊതുവിദ്യാഭ്യാസ മേഖലയെക്കുറിച്ച് പഠിക്കാന്‍ നിയോഗിക്കപ്പെട്ട 2014 ലെ പ്രൊഫ.ലബ്ബ കമ്മിറ്റിയും 2019 ലെ ഖാദര്‍ കമ്മിഷനും സ്‌കൂള്‍ ലൈബ്രറിയെക്കുറിച്ചും ലൈബ്രേറിയന്റെ ആവശ്യകതയെക്കുറിച്ചും സര്‍ക്കാരിന് റിപ്പോര്‍ട്ട് നല്‍കിയിട്ടുള്ളതുമാണ്. ഹയര്‍സെക്കന്‍ഡറിയില്‍ ക്ലര്‍ക്ക് , ലൈബ്രേറിയന്‍ ഉള്‍പ്പെടെ അനധ്യാപക നിയമനം ഉടന്‍ നടത്തണമെന്ന് കാണിച്ച് കോടതിയില്‍ നല്‍കിയ ഹരജിയില്‍ 2017 നവംബറില്‍ ഹര്‍ജിക്കാര്‍ക്ക് അനുകൂല ഉത്തരവുണ്ടായിട്ടുള്ളതാണ്.

ഇതിനെതിരേ അപ്പീലുമായി സര്‍ക്കാര്‍ കോടതിയെ സമീപിച്ചുവെങ്കിലും നിലവിലുള്ള ഉത്തരവ് രണ്ടു മാസത്തിനുള്ളില്‍ നടപ്പാക്കിയില്ലെങ്കില്‍ ഉദ്യോഗസ്ഥര്‍ക്കെതിരേ കോടതിയലക്ഷ്യ നടപടി സ്വീകരിക്കുമെന്ന് ഹൈക്കോടതി ഡിവിഷന്‍ ബെഞ്ച് മുന്നറിയിപ്പ് നല്‍കിയിട്ടുമുണ്ട്.
സര്‍ക്കാര്‍ മേഖലയില്‍ 816 ഉം , എയ്ഡഡ് മേഖലയിലെ 823 ഉം ഹയര്‍ സെക്കന്‍ഡറി സ്‌കൂളുകളാണ് നിലവിലുള്ളത്. പത്താംതരം വരെയുള്ള സ്‌കൂളുകളിലും നിലവില്‍ ലൈബ്രേറിയന്‍മാരില്ല. സ്‌കൂളുകള്‍ക്ക് ലഭിക്കുന്ന പുസ്തകങ്ങളും ലൈബ്രറിയും കൈകാര്യം ചെയ്യുന്നത് ഏതെങ്കിലും അധ്യാപകരാണ്. വായനയോട് താല്‍പര്യമില്ലാത്ത അധ്യാപകരാണെങ്കില്‍ പേരിന് മാത്രമായിരിക്കും ഇത്തരം ലൈബ്രറികളുടെ പ്രവര്‍ത്തനം നടക്കുക. എന്നാല്‍ കേന്ദ്രീയ വിദ്യാലയങ്ങള്‍, ജവഹര്‍ നവോദയ സ്‌കൂളുകള്‍, സി.ബി.എസ്.ഇ, ഐ.സി.എസ്.ഇ സ്‌കൂളുകള്‍ എന്നിവിടങ്ങളില്‍ മികച്ച ലൈബ്രറിയും യോഗ്യതയുള്ള ലൈബ്രേറിയന്‍മാരുമുണ്ട്.

സംസ്ഥാനത്ത് ഓരോ വര്‍ഷവും ലൈബ്രറി സയന്‍സ് പഠനം കഴിഞ്ഞിറങ്ങുന്നത് നൂറുകണക്കിന് ഉദ്യോഗാര്‍ഥികളാണ്. കേരളത്തിലെ യൂനിവേഴ്‌സിറ്റികള്‍ വഴിയും, ഇതര സംസ്ഥാന യൂനിവേഴ്‌സിറ്റികള്‍ വഴിയും റെഗുലര്‍, വിദൂര പഠനം വഴിയും ലൈബ്രറി സയന്‍സ് കോഴ്‌സുകള്‍ പഠിച്ചിറങ്ങുന്നവര്‍ക്കാണ് തൊഴില്‍ കിട്ടാത്ത അവസ്ഥ നിലനില്‍ക്കുന്നത്.