സ്വന്തം ലേഖകൻ
കൊച്ചി
നടിയെ അക്രമിച്ച കേസിൽ സെഷൻസ് കോടതി പുറപ്പെടുവിച്ച രഹസ്യവിചാരണ മാർഗ നിർദേശങ്ങൾ മാധ്യമങ്ങൾ ലംഘിച്ചോ എന്നു പരിശോധിക്കാൻ സംസ്ഥാന പൊലിസ് മേധാവിയോടു ഹൈക്കോടതി. നടിയെ ആക്രമിച്ച കേസിന്റെ വാർത്തകൾ പ്രസിദ്ധീകരിക്കുന്നതിനെതിരേ നടൻ ദിലീപ് സമർപ്പിച്ച ഹരജിയിലാണ് ഹൈക്കോടതി ഇടപെടൽ. ദിലീപിന്റെ ആരോപണത്തെ കുറിച്ച അന്വേഷണം നടത്തി റിപ്പോർട്ട് സമർപ്പിക്കാനാണ് കോടതി നിർദേശം. ദിലീപിന്റെ ആരോപണം ശരിയാണെങ്കിൽ ഉചിതമായ നടപടി കൈക്കൊള്ളണമെന്നും ജസ്റ്റിസ് കൗസർ എടപ്പഗത്ത് വ്യക്തമാക്കി. ഹരജി രണ്ടാഴ്ച കഴിഞ്ഞ് പരിഗണിക്കാൻ മാറ്റി. റിപ്പോർട്ടർ ചാനൽ മേധാവിയോടും കേസിൽ ഹാജരാകാൻ നിർദേശിച്ചു നോട്ടിസ് നൽകി.
ദിലീപ് നൽകിയ ഹരജി നിയമപരമായി നിലനിൽക്കുന്നതല്ലെന്ന് സർക്കാർ അഭിഭാഷകൻ കോടതിയെ അറിയിച്ചു. കേസുമായി ബന്ധപ്പെട്ടു പരാതിയുണ്ടെങ്കിൽ കേസ് പരിഗണിക്കുന്ന വിചാരണ കോടതിയെയാണ് സമീപിക്കേണ്ടതെന്നും പ്രോസിക്യുഷൻ കോടതിയിൽ അറിയിച്ചു. ഈ ആവശ്യമുന്നയിച്ചു ഹൈക്കോടതിയെ സമീപിക്കാൻ ദിലീപിന് അവകാശമില്ലെന്നും പ്രോസിക്യൂഷൻ കോടതിയിൽ ബോധിപ്പിച്ചു.
കേസിൽ രഹസ്യവിചാരണയാണ് നടക്കുന്നതെന്നും ഇതുസംബന്ധിച്ചുള്ള വിവരങ്ങൾ പുറത്തേക്കു വരുന്നില്ലെന്നും പ്രോസിക്യൂഷൻ വ്യക്തമാക്കി. ഹരജിക്കാരൻ നിസാരകാരണങ്ങളാണ് ചൂണ്ടിക്കാണിച്ചിരിക്കുന്നതെന്നും ഹരജി തള്ളണമെന്നും പ്രോസിക്യൂഷൻ വ്യക്തമാക്കി. വിചാരണ കോടതിയിൽ പ്രോസിക്യൂഷൻ പോലും ഇല്ല എന്നും കേസിന്റെ വിചാരണയുടെ എല്ലാ കാര്യങ്ങളും മാധ്യമങ്ങളിൽ വരുന്നുവെന്നും ഇത് വിലക്കണമെന്നും ദിലീപിന്റെ അഭിഭാഷകൻ ആവശ്യപ്പെട്ടു.
മാധ്യമവിചാരണയ്ക്ക് വഴിയൊരുക്കുംവിധം കേസിന്റെ വിവരങ്ങൾ ചോരുന്നില്ലെന്ന് ഉറപ്പാക്കാൻ വിചാരണക്കോടതി 2018 ജനുവരി 17ന് അന്വേഷണ ഉദ്യോഗസ്ഥന് നിർദേശം നൽകിയിരുന്നു. വിചാരണ നടപടികൾ മാധ്യമങ്ങൾ പ്രസിദ്ധീകരിക്കുന്നതു തടഞ്ഞ് 2020 മാർച്ച് 19ന് ഉത്തരവും നൽകി. ഇതു ലംഘിച്ച് മാധ്യമങ്ങൾ സംവിധായകൻ ബാലചന്ദ്രകുമാറിന്റെ വെളിപ്പെടുത്തലുകൾ പ്രസിദ്ധീകരിച്ചുവെന്നും ഇതിനെതിരേ നടപടി വേണമെന്നുമാണ് ദിലീപിന്റെ ഹരജിയിലെ ആവശ്യം.