കോട്ടയം: മാതാപിതാക്കള്‍ തനിച്ചുള്ള വീട്ടില്‍ മോഷ്ടാവ് കയറുന്ന ദൃശ്യം മൊബൈലില്‍ കണ്ട് കള്ളനെ കുടുക്കി മകള്‍. കടുത്തുരുത്തിയില്‍ താമസിക്കുന്ന മാതാപിതാക്കളുടെ വീട്ടിലെ മോഷണശ്രമം പാലായിലുള്ള മകള്‍ കണ്ട്
അയല്‍വാസിയെ വിവരം പറഞ്ഞതോടെ അയല്‍വാസി പൊലിസില്‍ അറിയിക്കുകയും ഉടന്‍ സ്ഥലത്തെത്തിയ പൊലിസ് മോഷ്ടാവിനെ ഓടിച്ചിട്ട് പിടികൂടുകയുമായിരുന്നു.

കീഴൂര്‍ മേച്ചേരില്‍ മാത്യുവും ഭാര്യയും താമസിക്കുന്ന വീട്ടില്‍ ബുധനാഴ്ച പുലര്‍ച്ചെ 1.30-ഓടെയാണ് സംഭവം.മോഷ്ടാവ് രണ്ട് ക്യാമറ തുണികൊണ്ട് മൂടിയശേഷം മൂന്നാമത്തെ ക്യാമറ മൂടാന്‍ ശ്രമിക്കുമ്പോഴാണ് സംഭവം യുവതി കാണുന്നത്.

ഉടന്‍തന്നെ മകള്‍ അയല്‍വാസിയായ പ്രഭാത് കുമാറിനെ വിവരം അറിയിച്ചു. പ്രഭാത് തലയോലപ്പറമ്പ് എസ്.ഐ. ജെയ്‌മോനെ വിളിച്ചു പറഞ്ഞു. ജെയ്‌മോന്‍ വെള്ളൂര്‍ പൊലിസില്‍ അറിയിച്ചതോടെ സ്ഥലത്തെത്തിയ പൊലിസിനെ കണ്ട് മോഷ്ടാവ് ഓടി രക്ഷപ്പെടാന്‍ ശ്രമിച്ചു. അര കിലോമീറ്ററോളം പിറകെ ഓടിയാണ് പൊലിസ് മോഷ്ടാവിനെ പിടികൂടിയത്.

വാതില്‍ പൊളിക്കാനും പൂട്ടുതുറക്കാനും ഉപയോഗിക്കുന്ന സ്റ്റീല്‍ കൊണ്ടുള്ള ആയുധവും പൊലിസ് കണ്ടെടുത്തു. പ്രതിയെ കോടതിയില്‍ ഹാജരാക്കിയതായി വെള്ളൂര്‍ എസ്എച്ച്ഒ എ.പ്രസാദ് അറിയിച്ചു.