അൻസാർ മുഹമ്മദ്
കൊച്ചി
കൊവിഡ് മൂന്നാം തരംഗം കൈകാര്യം ചെയ്യുന്നതിൽ ആരോഗ്യവകുപ്പ് വൻ പരാജയമെന്ന് സി.പി.എമ്മിലെ ഒരുവിഭാഗം മുതിർന്ന നേതാക്കൾ. ചില മുതിർന്ന കേന്ദ്ര കമ്മിറ്റി അംഗങ്ങളും സെക്രട്ടേറിയറ്റ് അംഗങ്ങളും ഇതുസംബന്ധിച്ച് സംസ്ഥാന സെക്രട്ടറി കോടിയേരി ബാലകൃഷ്ണനെ അതൃപ്തി അറിയിച്ചു. കൊവിഡ് വ്യാപനം രൂക്ഷമാകുമ്പോൾ പ്രതിരോധ നപടികൾ കൈകാര്യം ചെയ്യുന്നതിൽ കൂടുതൽ പ്രായോഗിക സമീപനം തിരഞ്ഞെടുക്കണമെന്നാണ് മുതിർന്ന നേതാക്കളുടെ ആവശ്യം. സർക്കാർ നേരിട്ടു തീരുമാനങ്ങൾ എടുക്കാതെ ഉദ്യോഗസ്ഥരെ ഏൽപ്പിക്കുന്നു. അവർ എന്താണോ നിർേദശിക്കുന്നത് അതു സർക്കാർ തീരുമാനമായി വകുപ്പുമന്ത്രി നടപ്പാക്കുന്നുവെന്നും നേതാക്കൾ പരാതിപ്പെട്ടു. കഴിഞ്ഞ രണ്ട് തരംഗത്തിലും മുഖ്യമന്ത്രിയാണ് നിർദേശങ്ങൾ നൽകുകയും നടപ്പാക്കുകയും ചെയ്തിരുന്നത്. അവലോകന യോഗത്തിൽ ശക്തമായ നടപടികളും സ്വീകരിച്ചിരുന്നു. എന്നാൽ മൂന്നാം തരംഗത്തിൽ രോഗികളുടെ എണ്ണം വർധിച്ചതിനു കാരണം ആരോഗ്യവകുപ്പിന്റെ അശ്രദ്ധയാണെന്നും മുതിർന്ന നേതാക്കൾ പറയുന്നു.

കഴിഞ്ഞ രണ്ട് തരംഗത്തിലും ടി.പി.ആറിനെ അടിസ്ഥാനമാക്കിയാണ് നിയന്ത്രണങ്ങൾ ഏർപ്പെടുത്തിയത്. ഇപ്പോൾ കാറ്റഗറി തിരിച്ചിരിക്കുന്നത് അശാസ്ത്രീയമായാണെന്നും നേതാക്കൾ ചൂണ്ടിക്കാട്ടി. മൂന്നാം തരംഗത്തിന്റെ ആദ്യഘട്ടത്തിൽ തന്നെ ആരോഗ്യവകുപ്പ് രണ്ടു തരംഗങ്ങളിലും ചെയ്ത രീതിയിൽ ഇടപെട്ടിരുന്നുവെങ്കിൽ സി.പി.എം സമ്മേളനങ്ങളാണ് കൊവിഡ് വ്യാപനം ഉണ്ടാക്കിയതെന്ന് ജനങ്ങൾക്കിടയിലുള്ള തെറ്റായ സന്ദേശം ഒഴിവാക്കാമായിരുന്നുവെന്നും നേതാക്കൾ അഭിപ്രായപ്പെട്ടു.

പുതിയ നിയന്ത്രണങ്ങളിലേക്ക് പോകുന്നതിനു പകരം റിവേഴ്‌സ് ക്വാറന്റൈനാണ് നടപ്പാക്കേണ്ടത്. ശാരീരിക പ്രശ്‌നങ്ങളില്ലാത്തവരെ ജോലിചെയ്യാൻ അനുവദിക്കുകയും പ്രായമായവരും രോഗാവസ്ഥയുള്ളവരും വീടിനുള്ളിൽ തന്നെ കഴിയാനുള്ള നടപടികളും സ്വീകരിക്കണം. ദുർബല വിഭാഗത്തിന് ബൂസ്റ്റർ ഡോസ് നൽകണം. നിയന്ത്രണങ്ങളും ലോക്ക്ഡൗൺ പോലുള്ള സാഹചര്യവും തിരഞ്ഞെടുക്കുന്നത് കൊവിഡ് വ്യാപനം തടയാൻ പരിഹാരമാവില്ലെന്നും നേതാക്കൾ പറഞ്ഞു. ബ്യൂറോക്രാറ്റുകളുടെ നിർദേശങ്ങൾക്ക് പകരം മെഡിക്കൽ വിദഗ്ധരുടെ നിർദേശങ്ങൾ സ്വീകരിക്കാമായിരുന്നു. ജില്ലകളെ വിവിധ വിഭാഗങ്ങളായി തിരിച്ചുള്ള സമീപകാല നിയന്ത്രണങ്ങൾ ജനങ്ങളിൽ ആശയക്കുഴപ്പം സൃഷ്ടിച്ചു. കൊവിഡ് വ്യാപനം ആരംഭിച്ചപ്പോൾ തന്നെ വിദ്യാഭ്യാസ സ്ഥാപനങ്ങളിൽ നിയന്ത്രണം ഏർപ്പെടുത്താമായിരുന്നു. സർക്കാർ പ്രഖ്യാപിച്ച് ഒരാഴ്ച കഴിഞ്ഞാണ് വിദ്യാഭ്യാസ സ്ഥാപനങ്ങൾ അടച്ചത്. അതിനിടയിൽ തന്നെ ഇവ ക്ലസ്റ്ററുകളായി മാറിയെന്നും നേതാക്കൾ അഭിപ്രായപ്പെട്ടു.