ന്യൂഡല്‍ഹി: ഇന്ത്യയിലെ ഐഫോണ്‍ വില്‍പനയില്‍ റെക്കോര്‍ഡിട്ട് ആപ്പിള്‍. ചരിത്രത്തിലെ ഏറ്റവും വലിയ നേട്ടമാണ് ആപ്പിള്‍ കൈവരിച്ചത്. 2020 നാലാം പാദത്തില്‍ 15 ലക്ഷത്തിലേറെ ഹാന്‍ഡ്‌സെറ്റുകളാണ് വിറ്റിരിക്കുന്നതെന്ന് കൗണ്ടര്‍ പോയിന്റ് റിസേര്‍ച്ച് പുറത്തുവിട്ട റിപ്പോര്‍ട്ടില്‍ പറയുന്നു.

ഐഫോണ്‍ 12 അവതരിപ്പിച്ചത്, ഐഫോണ്‍ എസ്ഇ 2020, ഐഫോണ്‍ 11 മോഡലുകള്‍ക്ക് വില കുറച്ചും ഓഫറുകള്‍ നല്‍കിയും മറ്റും വിറ്റതുമൊക്കെയാണ് കമ്പനിക്ക് ഗുണകരമായതെന്നാണ് റിപ്പോര്‍ട്ടുകള്‍ പറയുന്നത്.

ഇതോടെ രാജ്യത്ത് ഏറ്റവുമധികം സ്മാര്‍ട്ട് ഫോണ്‍ വില്‍ക്കുന്ന കമ്പനികളുടെ പട്ടികയില്‍ ആപ്പിള്‍ 6ാം സ്ഥാനത്തെത്തി. മുന്‍ വര്‍ഷത്തെ ഇതേ കാലയളവിലെ കണക്കുമായി തട്ടിച്ചു നോക്കുമ്പോള്‍ ആപ്പിളിന് 171 ശതമാനം വളര്‍ച്ചയാണ് കാണിക്കുന്നത്. അതേസമയം, 2019നെ അപേക്ഷിച്ച് 2020ലെ മൊത്തം വളര്‍ച്ച 93 ശതമാനമാണെന്നും പറയുന്നു.

ഐഫോണ്‍ 12 സീരീസ് അവതരിപ്പിച്ച കഴിഞ്ഞ വര്‍ഷത്തെ അവസാന പാദത്തില്‍ ആഗോള വിപണിയിലും ആപ്പിള്‍ ചരിത്രമെഴുതി. ഇതുവഴി ഏകദേശം 65.60 ബില്ല്യന്‍ ഡോളറാണ് കമ്പനിക്ക് കഴിഞ്ഞ പാദത്തില്‍ ലഭിച്ചത്. കൊവിഡ്19നെ തുടര്‍ന്ന് പല തവണ ലോകമെമ്പാടും കമ്പനിയുടെ സ്റ്റോറുകള്‍ അടച്ചിടേണ്ടി വന്നിട്ടും കമ്പനിക്ക് 2020ല്‍ മികച്ച പ്രകടനം നടത്താനായെന്നു റിപ്പോര്‍ട്ട് പറയുന്നു.

ആഗോള തലത്തിലും ഐഫോണ്‍ വില്‍പനയില്‍ ആപ്പിള്‍ ചരിത്രമെഴുതി. മൊത്തം ആപ്പിള്‍ ഉല്‍പ്പന്നങ്ങളുടെയും സേവനങ്ങുടെയും വില്‍പന വഴി കമ്പനിക്ക് 111.4 ബില്ല്യന്‍ ഡോളറാണ് ലഭിച്ചത്.