കണ്ണൂര്‍: സി.പി.എം ആക്ടിങ് സംസ്ഥാന സെക്രട്ടറി എ വിജയരാഘവനെതിരെ രൂക്ഷവിമര്‍ശനവുമായി കെ.പി.സി.സി വര്‍ക്കിങ് പ്രസിഡന്റും കണ്ണൂര്‍ എം.പിയുമായ കെ സുധാകരന്‍. വിജയരാഘവന്‍ ഇരിക്കുന്ന സ്ഥാനത്തെ അപമാനിക്കാന്‍ തനിക്ക് താല്‍പര്യമില്ലെന്നും എന്നാല്‍ കനക സിംഹാസനത്തില്‍ ഇരിക്കുന്നവന്‍ കനകനോ ശുംഭനോ ശുനകനോ എന്ന ചോദ്യത്തിന് പ്രസക്തിയുണ്ടെന്നും കെ സുധാകരന്‍ പറഞ്ഞു.

കോണ്‍ഗ്രസ് നേതാക്കള്‍ പാണക്കാട് എത്തി ലീഗ് നേതൃത്വവുമായി കൂടിക്കാഴ്ച നടത്തിയതിനെതിരെ അതിരൂക്ഷ വിമര്‍ശനമുന്നയിച്ച സി.പി.എം സംസ്ഥാന സെക്രട്ടറി എ വിജയരാഘവന് മറുപടി പറയുകയായിരുന്നു കെ.സുധാകരന്‍. വിജയരാഘവന് നാണമില്ലെങ്കില്‍ പാര്‍ട്ടിയ്ക്ക് നാണം വേണമെന്നും ഘടകക്ഷി നേതാക്കളുടെ വീടുകളില്‍ കോണ്‍ഗ്രസ് നേതാക്കള്‍ സന്ദര്‍ശിക്കുന്നതില്‍ തെറ്റില്ലെന്നും സുധാകരന്‍ കണ്ണൂരില്‍ പറഞ്ഞു.