കണ്ണൂര്‍: സ്വന്തം വീട്ടില്‍ ബോംബ് പൊട്ടിത്തെറിച്ച സംഭവത്തില്‍ ആര്‍.എസ്.എസ് നേതാവിനെ പൊലിസ് അറസ്റ്റ് ചെയ്തു. പയ്യന്നൂരിലെ സി.പി.എം പ്രവര്‍ത്തകന്‍ ധനരാജ് വധക്കേസില്‍ മുഖ്യപ്രതിയായ കാങ്കോല്‍ ആലക്കാട്ടെ ബിജുവിനെയാണ് പെരിങ്ങോം പൊലിസ് അറസ്റ്റു ചെയ്തത്.
ജനുവരി 29ന് പട്ടാപകലില്‍ വീട്ടിലുണ്ടായ ഉഗ്രസ്ഫോടനത്തെത്തുടര്‍ന്ന് ബിജുവിന്റെ കൈവിരലുകള്‍ അറ്റുപോയിരുന്നു. സ്ഫോടനം നടന്നതറിഞ്ഞ് പൊലിസ് സ്ഥലത്തെത്തി പരിശോധന നടത്തിയിരുന്നു.
പരുക്കേറ്റ് കോഴിക്കോട്ടെ സ്വകാര്യ ആശുപത്രിയില്‍ ചികിത്സയിലിരുന്ന ബിജുവിനെ ആശുപത്രിയില്‍ നിന്നു ഡിസ്ചാര്‍ജ് ചെയ്തതിനു പിറകെയാണ് അറസ്റ്റ്.പ്രതിയെ കോടതി റിമാന്‍ഡ് ചെയ്തു. സ്ഫോടകവസ്തുക്കള്‍ അനധികൃതമായി കൈകാര്യം ചെയ്തതിനാണ് ബിജുവിനെതിരെ കേസെടുത്തത്.