ദോഹ: മിഡില്‍ ഈസ്റ്റില്‍ താമസിക്കാനും ജോലി ചെയ്യാനുമുള്ള ഏറ്റവും മികച്ച ഇടമായി ഖത്തറിനെ എച്ച്എസ്ബിസിയുടെ ആഗോള പ്രവാസി സര്‍വെ തിരഞ്ഞെടുത്തു. അതേസമയം ആഗോളതലത്തില്‍ ആറാം സ്ഥാനത്താണ് ഖത്തര്‍ ആഗോളതലത്തില്‍ രണ്ടാം സ്ഥാനം നേടിയ സിംഗപ്പൂരിന് പുറമെ ആദ്യ പത്തില്‍ ഇടം നേടുന്ന ഏക ഏഷ്യന്‍ രാജ്യം കൂടിയാണ് ഖത്തര്‍.

 

ജീവിക്കാനും ജോലി ചെയ്യാനും ഏറ്റവും മികച്ച സ്ഥലങ്ങളുടെ വാര്‍ഷിക പട്ടികയായ എച്ച്എസ്ബിസി എക്‌സ്പാറ്റ് 2020, 13-ാം പതിപ്പാണ്. വിദേശത്ത് താമസിക്കുന്ന ആളുകളുടെ മനോഭാവങ്ങളും അഭിപ്രായങ്ങളും അനുഭവങ്ങളുടെയും അടിസ്ഥാനത്തിലാണ് ഈ പട്ടിക തയ്യാറാക്കുന്നത്. ‘ഖത്തര്‍ ലോകത്തിലെ ഏറ്റവും ചെറിയ രാജ്യങ്ങളിലൊന്നായിരിക്കാം, പക്ഷേ ഇത് ഏറ്റവും സമ്പന്നമായ രാജ്യമാണ്. വളരെ വേഗതയില്‍ വികസിച്ചുകൊണ്ടിരിക്കുന്ന രാജ്യമാണ്. ഇവിടേക്ക് എല്ലാ മേഖലകളിലെയും വിദേശ പ്രൊഫഷണലുകളെ ആകര്‍ഷിക്കുകയും ചെയ്യുന്നു,’ എച്ച്എസ്ബിസി ഖത്തറിനെക്കുറിച്ചുള്ള അവലോകനത്തില്‍ വിശദമാക്കി.