ലഖ്‌നൗ
പടിഞ്ഞാറൻ യു.പിയിൽ ബി.ജെ.പിക്ക് ഏറെ നിർണായകമായ 11 ജില്ലകളിലെ തെരഞ്ഞെടുപ്പിൽ ആവനാഴിയിലെ അവസാന അസ്ത്രവും തൊടുത്ത് യോഗി ആദിത്യനാഥ്.
വോട്ടെടുപ്പിന് ഏതാനും മണിക്കൂർ മുൻപ് കേരളം, ബംഗാൾ, ജമ്മു കശ്മിർ സംസ്ഥാനങ്ങളെ പ്രതിക്കൂട്ടിലാക്കി വോട്ടുപിടിക്കാനുള്ള തന്ത്രമാണ് യോഗി ആദിത്യനാഥിന്റെ വിഡിയോ സന്ദേശത്തിലൂടെ പുറത്തുവന്നത്. ഏതാനും ദിവസം മുൻപ് ഡൽഹി മുഖ്യമന്ത്രി അരവിന്ദ് കെജ് രിവാളുമായി ഏറ്റുമുട്ടിയ യോഗി, ആദ്യഘട്ട വോട്ടെടുപ്പ് ദിനത്തിൽ കേരള മുഖ്യമന്ത്രി പിണറായി വിജയനുമായി പോരിനിറങ്ങി എന്നത് യാദൃശ്ചികമല്ല. ലോക്‌സഭയിലെ ബജറ്റ് സമ്മേളനത്തിൽ പ്രധാനമന്ത്രി നരേന്ദ്രമോദി കൊവിഡ് പ്രതിരോധവുമായി ബന്ധപ്പെട്ട് ഡൽഹി സർക്കാരിനെ കരുവാക്കി നടത്തിയ പ്രസ്താവനയ്‌ക്കെതിരേ കെജ് രിവാൾ രംഗത്തുവന്നിരുന്നു. പ്രധാനമന്ത്രി പറഞ്ഞത് ശുദ്ധനുണയാണെന്നായിരുന്നു കെജ്‌രിവാളിന്റെ മറുപടി. ഇതിനു മറുപടി നൽകിയാണ് യോഗി ആദിത്യനാഥ് ട്വീറ്റ് ചെയ്തത്. എ.എ.പി സർക്കാർ കുടിയേറ്റ തൊഴിലാളികളുടെ വെള്ളവും വൈദ്യുതിയും തടഞ്ഞെന്നും അവരെ ഡൽഹിയിൽ നിന്ന് പുറത്താക്കുകയാണെന്നും ആരോപിച്ച് യോഗി രംഗത്തെത്തി. ഇതിനെതിരേ കൊവിഡ് കാലത്ത് പുഴയിൽ മൃതദേഹങ്ങൾ ഒഴുകിനടന്ന സംഭവമാണ് കെജ്‌രിവാൾ ട്വീറ്റ് ചെയ്തത്. യു.പി സർക്കാരിന്റെ വീഴ്ചകൾ കെജ് രിവാൾ ഓരോന്നായി ചൂണ്ടിക്കാട്ടിയതോടെയാണ് യോഗി ആദിത്യനാഥ് കേരളത്തിനുനേരെ തിരിഞ്ഞത്. കർഷകർക്കും ജാട്ടുകൾക്കും നിർണായക സ്വാധീനമുള്ള പടിഞ്ഞാറൻ യു.പിയിൽ പരാജയഭീതി ബി.ജെ.പിക്കുണ്ട്. ഇവിടെ പരാജയപ്പെട്ടാൽ യോഗിക്ക് കനത്ത തിരിച്ചടിയുണ്ടാകും. ഇത് മറികടക്കാനുള്ള തന്ത്രങ്ങൾ പയറ്റുകയാണ് ബി.ജെ.പി.