പനജി: ബഗാനെതിരേ ജയിച്ച കളി കൈവിട്ടു കേരള ബ്ലാസ്റ്റേഴ്‌സ്. അഡ്രിയാന്‍ ലൂണയുടെ (7,64) രണ്ടു ഗോളിലൂടെ മുന്നിലെത്തിയിട്ടും ഇഞ്ചുറി സമയത്തിന്റെ അവസാന നിമിഷത്തിലാണ് ബഗാനോട് ബ്ലാസ്‌റ്റേഴ്‌സ് സമനിലവഴങ്ങിയത്. \

ആദ്യ ഗോള്‍ നേട്ടം ആഘോഷിക്കാന്‍ അവസരം കിട്ടിയപ്പോഴെല്ലാം ജയം തുടര്‍ന്നിരുന്ന ബ്ലാസ്റ്റേഴ്‌സ് ഇത്തവണ സമനിലാശ്വാസം കണ്ടെത്തുകയായിരുന്നു. സഹല്‍ അബ്ദുല്‍ സമദിനെ ഫൗള്‍ ചെയ്തതിന് ഏഴാം മിനുട്ടില്‍ അഡ്രിയാന്‍ ലൂണുടെ ഫ്രീകിക്കിലൂടെ ബ്ലാസ്റ്റേഴ്‌സ് മുന്നിലെത്തിയത്. എന്നാല്‍ ഈ ഗോള്‍ ലീഡിന് അല്‍പ്പായുസ് മാത്രമേ ബഗാന്‍ നല്‍കിയുള്ളു. എട്ടാം മിനുട്ടില്‍ കൗണ്ടര്‍ അറ്റാക്കിലൂടെ ഡേവിഡ് വില്യംസ് എ.ടി.കെയ്ക്കായി സമനില പിടിച്ചു.

സമനിലകുരുക്കഴിക്കാന്‍ കേരള ബ്ലാസ്റ്റേഴ്‌സും മോഹന്‍ ബഗാനും ഒരോ നിമിഷവും ആക്രമിച്ചു കളിച്ചു. എ.ടി.കെ അതികസമയവും ആക്രമണം മെനഞ്ഞത് ലോങ് ബോളുകളിലൂടെയായിരുന്നു. ആദ്യപകുതി 11 സമനിലയില്‍ അവസാനിച്ചു.

64ാം മിനുട്ടില്‍ അഡ്രിയാന്‍ ലൂണയുടെ മനോഹരമായൊരു ഗോളിലൂടെ ബ്ലാസ്റ്റേഴ്‌സ് വീണ്ടും മുന്നിലെത്തി. എന്നാല്‍ കളിയവസാനിക്കാന്‍ അധിക സമയം നല്‍കിയ ഏഴ് മിനിറ്റില്‍ ഒരു മിനിറ്റ് ബാക്കിനില്‍ക്കെ ബ്ലാസ്‌റ്റേഴ്‌സിന്റെ പ്രതിരോധത്തെ നോക്കുകുത്തിയാക്കികൊണ്ട് ജോണി കൗക്കോയുടെ കിടിലന്‍ ഗോള്‍ പിറന്നതോടെ മത്സരം സമനിലയില്‍ പിരിയേണ്ടിവന്നു.