തിരുവനന്തപുരം: സെക്രട്ടേറിയറ്റിനു മുന്നില്‍ സമരത്തിലുള്ള പി.എസ്.സി ഉദ്യോഗാര്‍ഥികളുമായി ചര്‍ച്ച നടത്തി സര്‍ക്കാര്‍ പ്രതിനിധികള്‍. ആവശ്യങ്ങള്‍ ന്യായമാണെന്ന് സമ്മതിച്ച പ്രതിനിധികള്‍, അനുകൂലമായ തീരുമാനമെടുപ്പിക്കാന്‍ ശ്രമിക്കാമെന്ന മറുപടിയാണ് നല്‍കിയത്. ദക്ഷിണമേഖല ഐ.ജിയും അഭ്യന്തര സെക്രട്ടറിയുമാണ് സര്‍ക്കാരിനെ പ്രതിനിധീകരിച്ച് ഉദ്യോഗാര്‍ഥികളെ കണ്ടത്.

26 ദിവസമായി തുടരുന്ന പി.എസ്.സി സമരത്തിനിടെ ഇതാദ്യമായാണ് സര്‍ക്കാര്‍ ഒരു ചര്‍ച്ചയ്ക്ക് തയ്യാറാവുന്നത്. സര്‍ക്കാരുമായി ചര്‍ച്ച നടത്തി ഉദ്യോഗാര്‍ഥികള്‍ക്ക് അനുകൂലമായ ഒരു ഉത്തരവ് നല്‍കാന്‍ ശ്രമിക്കാം എന്നാണ് ചര്‍ച്ചയില്‍ ഉദ്യോഗസ്ഥര്‍ ഉദ്യോഗാര്‍ഥികള്‍ക്ക് ഉറപ്പ് നല്‍കിയത്.

ചര്‍ച്ചകളില്‍ സന്തോഷമുണ്ടെങ്കിലും സമരം തുടരുമെന്ന് ഉദ്യോഗാര്‍ഥികള്‍ പറഞ്ഞു. കൃത്യമായി ഉത്തരം കിട്ടുന്നത് വരെ സമാധാനപരമായി സമരം തുടരാനാണ് തീരുമാനം. സര്‍ക്കാരിനെ വിശ്വാസം ഇല്ലാഞ്ഞിട്ടല്ല. എങ്കിലും തങ്ങളുടെ ആവശ്യങ്ങളില്‍ സര്‍ക്കാര്‍ ഉത്തരവായി കിട്ടുന്ന വരെ സമരം തുടരേണ്ടതായിട്ടുണ്ട്. എന്തായാലും ശുഭ പ്രതീക്ഷ നല്‍കിയ ചര്‍ച്ചയാണിതെന്നും പി.എസ്.സി റാങ്ക് ഹോള്‍ഡേര്‍സ് പ്രതിനിധികള്‍ പറഞ്ഞു.