കൊച്ചി: ആഴക്കടല്‍ മത്സ്യബന്ധനത്തിന് അമേരിക്കന്‍ കമ്പനിയുമായുള്ള കരാറിലെ അഴിമതി കയ്യോടെ പിടികൂടുമെന്നായപ്പോഴാണ് സര്‍ക്കാര്‍ കരാര്‍ റദ്ദാക്കിയതെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി. കരാര്‍ റദ്ദാക്കി മത്സ്യത്തൊഴിലാളികളുടെ കണ്ണില്‍ പൊടിയിടാന്‍ എല്‍.ഡി.എഫ് സര്‍ക്കാരിന് കഴിയില്ല. മോഷണം കയ്യോടെ പിടിക്കപ്പെടുമ്പോള്‍ കൊള്ളമുതല്‍ തിരിച്ചുനല്‍കി തടിതപ്പുന്നതുപോലെയാണ് ആഴക്കടല്‍ മത്സ്യബന്ധന കരാറില്‍ നിന്ന് എല്‍.ഡി.എഫ് സര്‍ക്കാര്‍ പിന്മാറിയത്.

സുതാര്യമല്ലാതെ രഹസ്യമായി കരാറൊപ്പിട്ടത് മല്‍സ്യത്തൊഴിലാളികളെ വഞ്ചിക്കാനാണ്.യുവാക്കളുടെ സ്വപ്നങ്ങള്‍ സഫലമാക്കുന്നതിലും കഴിവുകള്‍ വിനിയോഗിക്കുന്നതിലും കേന്ദ്ര- കേരള സര്‍ക്കാരുകള്‍ പരാജയമാണെന്നും അദ്ദേഹം പറഞ്ഞു.

വൈപ്പിനിലെ യു.ഡി.എഫ് സ്ഥാനാര്‍ഥി ദീപക് ജോയിയുടെ തെരഞ്ഞെടുപ്പ് യോഗത്തില്‍ സംസാരിക്കുകയായിരുന്നു അദ്ദേഹം. യുവാക്കളുടെ ഊര്‍ജസ്വലത ഉപയോഗിക്കുന്നതില്‍ സര്‍ക്കാര്‍ പരാജയമാണെന്ന് കേരളത്തില്‍ നിന്നുള്ള എം.പിയെന്ന നിലയില്‍ തോന്നിയിട്ടുണ്ട്. അര്‍ഹരായ യുവാക്കളെ മറികടന്ന് പിന്‍വാതില്‍ നിയമനം നല്‍കുകയാണ് എല്‍.ഡി.എഫ് സര്‍ക്കാര്‍. സ്വന്തക്കാരുടെ താല്‍പര്യം സംരക്ഷിക്കാതെ സര്‍ക്കാര്‍ ജോലി അര്‍ഹരായവര്‍ക്ക് നല്‍കുകയാണ് വേണ്ടത്. സമ്പദ്ഘടന ശക്തമാക്കി തൊഴിലവസരങ്ങള്‍ സൃഷ്ടിക്കുന്ന സമീപനമല്ല കേന്ദ്ര സര്‍ക്കാറിന്റെത്.

സാധാരണക്കാരിലേയ്ക്ക് കൂടുതല്‍ പണം നേരിട്ട് എത്തണം. കോണ്‍ഗ്രസിന്റെ ന്യായ് പദ്ധതിയുടെ ലക്ഷ്യം അതാണ്. പണം ലഭിക്കുമ്പോള്‍ ജനങ്ങളുടെ വാങ്ങല്‍ ശേഷി വര്‍ധിക്കും. അതുവഴി വിപണിയിലേയ്ക്ക് കൂടുതല്‍ പണമെത്തും. ഉല്‍പന്നങ്ങള്‍ ആവശ്യമാകുമ്പോള്‍ വ്യവസായങ്ങള്‍ കരുത്തുനേടും. അതുവഴി കൂടുതല്‍ തൊഴിലവസരങ്ങളുണ്ടാകും. യുവാക്കള്‍ക്ക് പ്രാമുഖ്യം നല്‍കുകയും പരിചയസമ്പന്നരെ വിനിയോഗിക്കുകയും ചെയ്യുന്ന വിധത്തിലാണ് കേരളത്തില്‍ സ്ഥാനാര്‍ഥികളെ നിശ്ചയിച്ചത്. യു.ഡി.എഫിലെ കൂടുതല്‍ യുവാക്കള്‍ ഇക്കുറി നിയമസഭയിലെത്തുമെന്നും അദ്ദേഹം പറഞ്ഞു.