ന്യൂഡല്‍ഹി: കര്‍ഷക മാര്‍ച്ചിന് കണ്ണീര്‍വാതകം പ്രയോഗിച്ച് പ്രയോഗിച്ച് പൊലിസ്. ശംഭു അതിര്‍ത്തിയില്‍ വെച്ചാണ് മാര്‍ച്ച് പൊലിസ് തടഞ്ഞത്. കര്‍ഷക സംഘടനകളായ സംയുക്ത കിസാന്‍ മോര്‍ച്ചയും (രാഷ്ട്രീയേതര) കിസാന്‍ മസ്ദൂര്‍ മോര്‍ച്ചയും ചേര്‍ന്നുള്ള 101 കര്‍ഷകരുടെ സംഘമാണ് മാര്‍ച്ച് നടത്തുന്നത്. 

മാര്‍ച്ച് തടയാന്‍ ശംഭു അതിര്‍ത്തിയില്‍ കനത്ത പൊലിസ് സന്നാഹമാണ് ഒരുക്കിയിരുന്നത്. വാഹനങ്ങള്‍ കടന്നുപോകാതിരിക്കാന്‍ റോഡുകളില്‍ ബാരിക്കേഡുകളും ആണികളും സ്ഥാപിച്ചിട്ടുണ്ട്. ശംഭു അതിര്‍ത്തിയിയുടെ ഒരു കിലോമീറ്റര്‍ മുന്‍പ് വെച്ച് മാധ്യമപ്രവര്‍ത്തകര്‍ പ്രതിഷേധം റിപ്പോര്‍ട്ട് ചെയ്യുന്നത് തടയണമെന്ന് സംസ്ഥാന പൊലിസ് മേധാവിക്ക് നിര്‍ദേശം നല്‍കിയിട്ടുണ്ട്.

രണ്ട് ദിവസം മുന്‍പ് നടന്ന മാര്‍ച്ചിലും ഹരിയാന-പഞ്ചാബ് ശംഭു അതിര്‍ത്തി കടക്കാന്‍ ശ്രമിച്ച കര്‍ഷകര്‍ക്ക് നേരെ പൊലിസ് കണ്ണീര്‍ വാതകവും റബ്ബര്‍ ബുള്ളറ്റുകളും പ്രയോഗിച്ചിരുന്നു. ഇതില്‍ നിരവധി കര്‍ഷകര്‍ക്ക് പരിക്കേറ്റതോടെ മാര്‍ച്ച് താല്‍ക്കാലികമായി നിര്‍ത്തിയതായിരുന്നു. 

മിനിമം താങ്ങുവിലയ്ക്ക് നിയമപരമായ ഗ്യാരണ്ടി, കാര്‍ഷിക കടം എഴുതിത്തള്ളല്‍, കര്‍ഷകര്‍ക്ക് പെന്‍ഷന്‍, വൈദ്യുതി നിരക്ക് വര്‍ധിപ്പിക്കരുത് തുടങ്ങി വിവിധ ആവശ്യങ്ങളുന്നയിച്ചാണ് കര്‍ഷകര്‍ സമരം നടത്തുന്നത്. ചര്‍ച്ചക്ക് തയ്യാറാണെന്ന് കഴിഞ്ഞ ദിവസം കേന്ദ്രം അറിയിച്ചിരുന്നു.