ചെറുപുഴ: കല്യാണമാലയില്‍ നിന്ന് വിത്തുണ്ടാക്കി വെന്തിപ്പൂ കൃഷി നടത്തി വിജയം കൈവരിച്ചിരിക്കുകയാണ് ചെറുപുഴ ബാലവാടി റോഡിലെ തണ്ടയില്‍ ഷെരീഫ് എന്ന നാല്‍പത്തിഒന്നുകാരന്‍.
തന്റെ അയല്‍വാസിയുടെ മകളുടെ കല്ല്യാണത്തിന് തമിഴ്‌നാട്ടില്‍ നിന്നും കൊണ്ടുവന്ന വെന്തി മാലയുടെ വിത്തെടുത്ത് പാകി മുളപ്പിച്ചാണ് ഇയാള്‍ നാല്‍പത് സെന്റ് സ്ഥലത്ത് രണ്ടായിരത്തോളം ചെടികള്‍ നട്ടുപിടിപ്പിച്ചിച്ചത്.
ഇവയെല്ലാം ഇപ്പോള്‍ പൂത്തു തുടങ്ങിയിരിക്കുകയാണ്. ഇതിലൂടെ അന്യസംസ്ഥാനത്ത് മാത്രമല്ല  മലയോരത്തും ഇവ കൃഷി ചെയ്യാമെന്ന് ഷെരീഫ് തെളിയിച്ചു കഴിഞ്ഞു. മഞ്ഞ നിറമുള്ള വെന്തിയാണധികവും ഓണക്കാലത്ത് കര്‍ണാടകയില്‍ നിന്നും തമിഴ്‌നാട്ടില്‍ നിന്നും വരുന്നത്.  പൂക്കള്‍ തീവിലയ്ക്ക് വാങ്ങുന്നതിന് പകരം സ്വന്തം നാട്ടില്‍ ചുരുങ്ങിയ വിലയ്ക്ക് പൂ ലഭിക്കണമെന്ന ഉദ്ദേശത്തോടെയാണ് ഇദ്ദേഹം പൂകൃഷി തുടങ്ങിയത്.  വലിയ ഉല്‍പാദന ചിലവില്ലാത്തതിനാല്‍ ലാഭമല്ലാതെ നഷ്ടമുണ്ടാവില്ലെന്ന് ഷെരീഫ് പറയുന്നു.