ആലക്കോട്: ഓട്ടോറിക്ഷയില്‍ വിദേശമദ്യം വില്പന നടത്തുന്നതിനിടെ മൂന്നുപേര്‍ എക്‌സൈസ് സംഘത്തിന്റെ പിടിയിലായി. വ്യാഴാഴ്ച രാത്രി 10 മണിയോടെ ആലക്കോട് ലിങ്ക് റോഡില്‍ വച്ചായിരുന്നു  അറസ്റ്റ്. ലിങ്ക് റോഡില്‍ വ്യാപാര സ്ഥാപനം നടത്തുന്ന വി.സി സണ്ണി (54), ജയഗിരി സ്വദേശി കെ.ജി അനുകുമാര്‍ (32), ആലക്കോട് സ്വദേശി വി.യു റെജി(47) എന്നിവരാണ് അറസ്റ്റിലായത്.
ഇവരില്‍ നിന്ന് 32 ലിറ്റര്‍ വിദേശ മദ്യവും പിടികൂടി. മദ്യം സൂക്ഷിച്ചിരുന്ന ഓട്ടോറിക്ഷയും കസ്റ്റഡിയില്‍ എടുത്തിട്ടുണ്ട്. ലിങ്ക് റോഡിലെ ബിവറേജ് ഔട്ട്‌ലെറ്റില്‍ നിന്നു വന്‍ തോതില്‍ മദ്യം ശേഖരിച്ച് മറ്റു സ്ഥലങ്ങളില്‍ വില്‍പ്പന നടത്തുന്ന സംഘത്തില്‍പെട്ടവരാണ് ഇവരെന്ന് ഉദ്യോഗസ്ഥര്‍ പറഞ്ഞു. ഔട്ട്‌ലെറ്റിലെ ചില ജീവനക്കാരുടെ ഒത്താശയോടെയാണ് ഇവര്‍ക്ക് വന്‍ തോതില്‍ മദ്യം ലഭിക്കുന്നതെന്നും ആക്ഷേപമുണ്ട്. എക്‌സൈസ് ഇന്‍പെക്ടര്‍ കെ പ്രദീപന്‍, പ്രിവന്റിവ് ഓഫിസര്‍ സി.സി രാജന്‍, സിവില്‍ എക്‌സൈസ് ഓഫിസര്‍മാരായ ടി.ആര്‍ രാജേഷ്, പി.കെ രാജീവ്, ജോസ് ടി ജോസ്, കെ.ജി മുരളീദാസ് എന്നിവരുടെ നേതൃത്വത്തിലായിരുന്നു പരിശോധന.