തിരുവനന്തപുരം
കേന്ദ്ര സർക്കാരിന്റെ തൊഴിൽ നയങ്ങൾക്കെതിരേ ട്രേഡ് യൂനിയൻ സംയുക്ത സമിതി 48 മണിക്കൂർ പണിമുടക്ക് പ്രഖ്യാപിച്ചതിനാൽ നാളെയും മറ്റന്നാളും സംസ്ഥാനം സ്തംഭിക്കും.
തൊഴിലാളിവിരുദ്ധ ലേബർ കോഡുകൾ പിൻവലിക്കുക, കർഷകരുടെ അവകാശപത്രിക അംഗീകരിക്കുക തുടങ്ങി 12 ആവശ്യങ്ങൾ ഉന്നയിച്ചുള്ള പൊതു പണിമുടക്ക് ഇന്ന് അർധ രാത്രി മുതലാണ്.
കർഷക സംഘടനകൾ, കർഷകത്തൊഴിലാളി സംഘടനകൾ, കേന്ദ്ര, സംസ്ഥാന സർവിസ് സംഘടനകൾ, അധ്യാപക സംഘടനകൾ, ബി.എസ്.എൻ.എൽ, എൽ.ഐ.സി, ബാങ്ക് ജീവനക്കാരുടെ സംഘടനകൾ, തുറമുഖ തൊഴിലാളികൾ എന്നിവരെല്ലാം പണിമുടക്കിൽ പങ്കുചേരുന്നുണ്ട്. വ്യോമയാന, റെയിൽവേ മേഖലകളിലെ തൊഴിലാളി സംഘടനകളും പണിമുടക്കിന് ഐക്യദാർഢ്യം പ്രഖ്യാപിച്ചിട്ടുള്ളതിനാൽ ആ മേഖലയിലും പണിമുടക്ക് ബാധിക്കും. എങ്കിലും ട്രെയിൻ, വ്യാമ ഗതാഗതം തടസപ്പെടില്ല.അതേസമയം, 48 മണിക്കൂർ പൊതുപണിമുടക്കിൽ കടുത്ത ആശങ്ക രേഖപ്പെടുത്തി സംസ്ഥാനത്ത വ്യവസായ, വാണിജ്യമേഖല രംഗത്തെത്തി. ശതകോടികളുടെ നഷ്ടമുണ്ടാകുമെന്നാണ് കോൺഫെഡറേഷൻ ഓഫ് ഇന്ത്യൻ ഇൻഡസ്ട്രീസ് അടക്കം കണക്കുകൂട്ടുന്നത്.