കൊച്ചി
ക്ഷേത്രങ്ങളിലെ ബ്രാഹ്മണരുടെ കാല്‍കഴുകിച്ചൂട്ട് വഴിപാടില്‍ അപാകതയില്ലന്ന് ഹൈക്കോടതി. തൃപ്പൂണിത്തുറ ശ്രീ പൂര്‍ണത്രയീശ ക്ഷേത്രത്തിലടക്കം നടക്കുന്ന കാല്‍കഴുകിച്ചൂട്ട് വഴിപാട് സംബന്ധിച്ച മാധ്യമ വാര്‍ത്തകളുടെ അടിസ്ഥാനത്തിൽ ജസ്റ്റിസ് അനില്‍. കെ. നരേന്ദ്രന്‍, ജസ്റ്റിസ് പി.ജി അജിത് കുമാര്‍ എന്നിവരടങ്ങുന്ന ഡിവിഷന്‍ ബെഞ്ച് സ്വമേധയ എടുത്ത കേസ് തീർപ്പാക്കിക്കൊണ്ടാണ് കോടതിയുടെ നിരീക്ഷണം.
പുറത്തു കാണാത്ത വിധത്തില്‍ പന്ത്രണ്ട് ബ്രാഹ്മണരെ ഇരുത്തിയാണ് കാല്‍കഴുകിച്ചൂട്ട് വഴിപാട് നടത്തുന്നത്. പാപ പരിഹാരത്തിനായി നടത്തുന്ന ഈ വഴിപാടിന് 20,000 രൂപയാണ് ഈടാക്കുന്നത്. അടുത്തിടെ കൊടുങ്ങല്ലൂര്‍ എടവിലങ്ങ് ശിവകൃഷ്ണപുരം മഹാദേവര്‍ ക്ഷേത്രത്തില്‍ പുനരുദ്ധാരണ ചടങ്ങുകളുടെ ഭാഗമായി നടത്താന്‍ നിശ്ചയിച്ചിരുന്ന ഇതേ ചടങ്ങ് വിവാദമായതോടെ കൊച്ചിന്‍ ദേവസ്വം ബോര്‍ഡ് ഉപേക്ഷിച്ചിരുന്നു. ഇതിനു പിന്നാലെയാണ് കൊച്ചിന്‍ ദേവസ്വം ബോര്‍ഡിന് കീഴിലുള്ള പൂര്‍ണത്രയീശ ക്ഷേത്രത്തില്‍ ഈ ആചാരം വഴിപാടായി നടത്തുന്ന വിവരം പുറത്തു വന്നത്.
ക്ഷേത്രത്തില്‍ നിലവിലുള്ള ചടങ്ങുകള്‍ തുടരാന്‍ ദേവസ്വം ബോര്‍ഡിന് ബാധ്യതയുണ്ട്. ഇതില്‍ ദേവസ്വം ബോര്‍ഡിനോ സര്‍ക്കാരിനോ ഇടപെടാനാവില്ലെന്നും കോടതി വ്യക്തമാക്കി.