കൊച്ചി: കടക്കെണിയിലായ കെ.എസ്.ആർ.ടി.സി. പുതിയ നയം നടപ്പാക്കുന്നു. ഇനി മുതൽ വരുമാനത്തിന് ആനുപാതികമായി മാത്രമേ ശമ്പളം നൽകാനാവുവെന്ന് കെ.എസ്.ആർ.ടി.സി ഹൈക്കോടതിയെ അറിയിച്ചു. ഏപ്രിൽ മുതൽ ആകും വരുമാനത്തിനനുസരിച്ച് ശമ്പളം നൽകുക. ഏപ്രിൽ മുതൽ ശമ്പളത്തിനായി സഹായം നൽകില്ലെന്ന് സംസ്ഥാന സർക്കാർ അറിയിച്ചിട്ടുണ്ട്. ഈ സാഹചര്യത്തിൽകൂടിയാണ് കെ.എസ്.ആർ.ടി.സിയുടെ തീരുമാനം.

ഫണ്ടില്ലാത്തതിനെ പറ്റി ഒരു ജീവനക്കാരൻ പോലും വേവലാതിപ്പെടുന്നില്ല. വരുമാന വർധനക്കുള്ള നീക്കങ്ങളെല്ലാം യൂണിയനുകൾ പ്രതികാര ബുദ്ധിയോടെ എതിർക്കുകയാണെന്നും കെ.എസ്.ആർ.ടി.സി ഹൈകോടതിയിൽ നിലപാടറിയിച്ചു.

നേരത്തെ വിരമിച്ച കെ.എസ്.ആര്‍.ടി.സി ജീവനക്കാര്‍ മനുഷ്യരാണെന്ന് മറക്കരുതെന്ന് ഹൈകോടതി പറഞ്ഞിരുന്നു. ആനുകൂല്യവിതരണത്തിന് രണ്ടുവര്‍ഷത്തെ സാവകാശം അനുവദിക്കാനാവില്ല. കുറച്ചെങ്കിലും ആനുകൂല്യം നല്‍കിയിട്ട് സാവകാശം തേടൂവെന്ന് കോടതി പറഞ്ഞിരുന്നു. ഇതിന് പിന്നാലെയാണ് വരുമാനത്തിന് ആനുപാതികമായി മാത്രമേ ശമ്പളം വിതരണം ചെയ്യാനാവുവെന്ന നിലപാട് കെ.എസ്.ആർ.ടി.സി സ്വീകരിച്ചിരിക്കുന്നത്.