ആലപ്പുഴ: മന്ത്രി ജി.സുധാകരനെതിരായ പരാതി കടുപ്പിച്ച് പരാതിക്കാരി. താന്‍ പരാതി പിന്‍വലിക്കില്ലെന്ന് പരാതിക്കാരി വീണ്ടും വ്യക്തമാക്കി. മന്ത്രി പരസ്യമായി മാപ്പ് പറയാതെ പിന്‍വലിക്കില്ലെന്നും അവര്‍ തറപ്പിച്ചു പറഞ്ഞു. തന്റെ ജീവനു ഭീഷണിയുണ്ട്. നായര്‍ സമുദായത്തിലെ യുവതിയെ ഈഴവ സമുദായത്തിലെ പുരുഷന്‍ വിവാഹം ചെയ്തതുകൊണ്ടാണ് ഭര്‍ത്താവിനെ ജോലിയില്‍ നിന്ന് പിരിച്ചുവിട്ടതെന്ന ഗുരുതര ആരോപണവും അവര്‍ മന്ത്രിക്കെതിരേ നടത്തി.
ജീവിക്കാന്‍ അനുവദിക്കണം. അതുകൊണ്ടാണ് മാധ്യമങ്ങള്‍ക്ക് മുന്നില്‍ വരുന്നത്. കേസ് എടുക്കാന്‍ തയാറായില്ലെങ്കില്‍ കോടതിയില്‍ പോകും. മന്ത്രിയുടെ പേഴ്‌സണല്‍ സ്റ്റാഫ് ആയിരുന്ന തന്റെ ഭര്‍ത്താവിനെ പുറത്താക്കിയത് ജാതീയമായ വേര്‍തിരിവ് പറഞ്ഞാണ്. ഇക്കാര്യത്തില്‍ മുഖ്യമന്ത്രിക്ക് പരാതി നല്‍കിയെന്നും എന്നാല്‍ നടപടിയുണ്ടായിട്ടില്ലെന്നും യുവതി മാധ്യമപ്രവര്‍ത്തകരോട് പറഞ്ഞു.