സുനി അൽഹാദി
കൊച്ചി
അന്താരാഷ്ട്ര വിമാനയാത്രയ്ക്കുള്ള നിരോധനം കേന്ദ്ര സർക്കാർ പിൻവലിച്ചതോടെ, നാട്ടിലേക്കും തിരിച്ചുമുള്ള യാത്രകളിൽ കൈപൊള്ളില്ലെന്ന പ്രതീക്ഷയിലാണ് പ്രവാസികൾ.
കേരളത്തിലേക്കടക്കം പറന്നിറങ്ങാൻ രാജ്യവ്യാപകമായി കൂടുതൽ സർവിസിന് തയാറെടുക്കുകയാണ് വിമാനകമ്പനികൾ. വേനലവധിക്കാലത്ത് കേരളത്തിൽനിന്ന് നിരവധി കുടുംബങ്ങൾ വിസിറ്റിങ് വിസയിലും മറ്റും ഗൾഫിലേക്ക് പോകുന്ന പതിവുണ്ട്. ഗൾഫിൽ കഴിയുന്ന പ്രവാസി കുടുംബങ്ങൾ അവിടുത്തെ വെക്കേഷൻ കാലമായ ജൂലൈ, ഒാഗസ്റ്റ് മാസങ്ങളിൽ നാട്ടിലേക്ക് എത്താറുമുണ്ട്. എന്നാൽ, കൊവിഡ് നിയന്ത്രണം കാരണം രണ്ടുവർഷമായി ഇത്തരം യാത്രകളൊക്കെയും മുടങ്ങിക്കിടക്കുകയായിരുന്നു.
നിയന്ത്രണങ്ങളിൽ ഇളവു വന്നതിനെ തുടർന്ന് എയർ ബബിൾ കരാറുകളുടെയും മറ്റും ഭാഗമായി കുറഞ്ഞ സർവിസുകളാണ് നടത്തിയിരുന്നത്. ഇവയിലാകട്ടെ പത്തിരട്ടിവരെ നിരക്ക് ഉയർന്നിരുന്നു. കഴിഞ്ഞ ഒക്ടോബറിൽ യു.എ.ഇയിലേക്ക് ടിക്കറ്റ് നിരക്ക് 70,000 രൂപ വരെയായി. കുവൈത്ത്-കൊച്ചി ടിക്കറ്റിന് സെപ്റ്റംബർ ആദ്യം മൂന്ന് ലക്ഷം രൂപവരെ ഉയർന്നിരുന്നു.
എന്നാൽ, നിയന്ത്രണങ്ങളിൽ കാര്യമായ ഇളവുവന്ന സാഹചര്യത്തിൽ കഴിഞ്ഞ 27 മുതൽ അന്താരാഷ്ട്ര വിമാന സർവിസുകൾക്കുള്ള നിയന്ത്രണം എടുത്തുകളഞ്ഞിരിക്കുകയാണ്. ഇതോടെ, കൊച്ചിയും തിരുവനന്തപുരവുമടക്കമുള്ള ഇന്ത്യൻ വിമാനത്താവളങ്ങളിലേക്ക് കൂടുതൽ സർവിസിന് ഒരുങ്ങുകയാണ് വിദേശ വിമാന കമ്പനികൾ. എമിറേറ്റ്‌സ്, ലുഫ്താൻസ്, സിംഗപ്പൂർ എയർലൈൻസ് തുടങ്ങിയ വിദേശ വിമാന കമ്പനികളും ഇൻഡിഗോ ഉൾപ്പെടെയുള്ള ഇന്ത്യൻ കമ്പനികളുമാണ് കൂടുതൽ സർവിസ് നടത്തുക. ഇതോടെ, നിലവിലുള്ള ടിക്കറ്റ് നിരക്കിൽനിന്ന് 40 ശതമാനംവരെ കുറവ് വരാനിടയുണ്ടെന്ന പ്രതീക്ഷയാണ് ട്രാവൽ ഓപറേറ്റർമാരും പ്രവാസികളും പങ്കുവയ്ക്കുന്നത്.
വിമാന നിരക്കിൽ ഗണ്യമായ കുറവ് വരുന്നതോടെ ഉംറ സർവിസ് ഉൾപ്പെടെയുള്ളവ പഴയതുപോലെ പുനഃസ്ഥാപിക്കാനാകുമെന്ന പ്രതീക്ഷയിലാണ് ട്രാവൽ രംഗത്ത് പ്രവർത്തിക്കുന്നവർ. അതേസമയം, ഇന്ധന വിലയിൽ തുടരെത്തുടരെയുള്ള വർധന ടിക്കറ്റ് നിരക്കിളവ് പ്രതീക്ഷകൾക്ക് മങ്ങലേൽപ്പിക്കുമോ എന്ന ആശങ്കയുമുണ്ട്.