വി.കെ പ്രദീപ്
കണ്ണൂർ
ഹിന്ദി ഭാഷ അടിച്ചേൽപ്പിക്കാൻ ശ്രമിച്ചാൽ അംഗീകരിക്കാനാവില്ലെന്ന് മുഖ്യമന്ത്രി പിണറായി വിജയൻ.
സി.പി.എം പാർട്ടി കോൺഗ്രസിന്റെ ഭാഗമായി എ.കെ.ജി നഗറിൽ (ജവഹർ സ്റ്റേഡിയം) കേന്ദ്ര- സംസ്ഥാന ബന്ധങ്ങൾ എന്ന വിഷയത്തിൽ സംഘടിപ്പിച്ച സെമിനാർ ഉദ്ഘാടനം ചെയ്യുകയായിരുന്നു മുഖ്യമന്ത്രി.
വ്യത്യസ്ത ഭാഷകളും സംസ്‌കാരങ്ങളും നിലനിൽക്കുന്നതാണ് നമ്മുടെ രാജ്യത്തിന്റെ സവിശേഷത. ഇത്തരം വൈവിധ്യങ്ങളെ ഉൾക്കൊള്ളുന്നതാണ് ജനാധിപത്യം. പ്രാദേശിക ഭാഷകളെ ദുർബലപ്പെടുത്താനാണ് ശ്രമം.

ഫെഡറൽ സംവിധാനങ്ങളെ നിരാകരിക്കുകയെന്നത് സംഘ്പരിവാർ അജണ്ടയാണ്. ഭാഷയെ തകർത്താൽ രാജ്യത്തെ വൈവിധ്യങ്ങളെ ഇല്ലാതാക്കാം. ഐക്യവും അഖണ്ഡതയും തകർക്കാനുള്ള നീക്കമാണിത്. അത്തരം നീക്കങ്ങൾ വന്നാൽ കൈയും കെട്ടിനോക്കിനിൽക്കില്ലന്നും മുഖ്യമന്ത്രി കൂട്ടിച്ചേർത്തു.
സംസ്ഥാനങ്ങളുടെ വികസന പ്രവർത്തനങ്ങളാകെ കേന്ദ്രം അട്ടിമറിക്കുകയാണ്. ഫെഡറൽ സംവിധാനത്തെ ശക്തിപ്പെടുത്തുന്നതിനുള്ള പുതിയൊരു സാഹചര്യത്തിനാണ് ഇവിടെ തുടക്കമാകുന്നതെന്നും പിണറായി പറഞ്ഞു.

പ്രതിപക്ഷ ഐക്യം
അനിവാര്യം: സ്റ്റാലിൻ

നാനാത്വത്തിൽ ഏകത്വം എന്ന നയം അട്ടിമറിച്ച് ഏകത്വം മാത്രം നടപ്പാക്കാൻ ബി.ജെ.പി ശ്രമിക്കുകയാണെന്ന് തമിഴ്‌നാട് മുഖ്യമന്ത്രി എം.കെ സ്റ്റാലിൻ. ബ്രിട്ടീഷുകാർ പോലും നടപ്പാക്കാത്ത നയങ്ങളാണ് കേന്ദ്രം അടിച്ചേൽപ്പിക്കുന്നത്. ഇത് അംഗീകരിക്കാൻ ബുദ്ധിമുട്ടുണ്ട്. കേന്ദ്ര-സംസ്ഥാന ബന്ധങ്ങൾ തകർക്കുന്ന നയം നേരത്തെയും കേന്ദ്ര സർക്കാരുകൾ സ്വീകരിച്ചിട്ടുണ്ട്.
കേരളത്തിൽ ആദ്യമായി തെരഞ്ഞെടുക്കപ്പെട്ട സർക്കാരിനെ കേന്ദ്രം പിരിച്ചുവിട്ടു.
തമിഴ്‌നാട്ടിൽ അധികാരത്തിൽ വന്ന ഡി.എം.കെ സർക്കാരിനെ രണ്ട് തവണയും കേന്ദ്രം പിരിച്ചുവിട്ടു.
ജനാധിപത്യ സർക്കാരുകളെ നോക്കുകുത്തിയാക്കരുതെന്നും സ്റ്റാലിൻ ഓർമിപ്പിച്ചു.