സ്വന്തം ലേഖകൻ
കൊച്ചി
നടിയെ ആക്രമിച്ച കേസുമായി ബന്ധപ്പെട്ട് നടൻ ദിലീപിൻ്റെ മുൻ ഭാര്യ കൂടിയായ നടി മഞ്ജു വാര്യരുടെ മൊഴി ക്രൈംബ്രാഞ്ച് രേഖപ്പെടുത്തി. കഴിഞ്ഞ ദിവസം കൊച്ചിയിലെ ഹോട്ടലില്‍ എത്തിയാണ് അന്വേഷണസംഘം മൊഴിയെടുത്തത്. ഓഡിയോ ക്ലിപ്പുകളിലെ ദിലീപ്, സഹോദരന്‍ അനൂപ്, സഹോദരീ ഭര്‍ത്താവ് സുരാജ് എന്നിവരുടെ ശബ്ദം മഞ്ജു വാര്യർ തിരിച്ചറിഞ്ഞതായി ക്രൈെം ബ്രാഞ്ച് അറിയിച്ചു. ബാലചന്ദ്രകുമാര്‍ കൈമാറിയതും ഫോറൻസിക് പരിശോധനയിൽ പ്രതികളുടെ ഫോണുകളിൽ നിന്ന് കണ്ടെടുത്തതുമായ ശബ്ദരേഖകളാണ് അന്വേഷണ സംഘം മഞ്ജുവിനെ കേൾപ്പിച്ചത്. പ്രതികളുമായി വര്‍ഷങ്ങളോളം ബന്ധം ഉണ്ടായിരുന്ന മഞ്ജു ഇവരുടെ ശബ്ദം തിരിച്ചറിഞ്ഞത് അന്വേഷണസംഘത്തിന് ഗുണം ചെയ്യും. ദിലീപിന് ആക്രമിക്കപ്പെട്ട നടിയോട് വൈരാഗ്യം ഉണ്ടായിരുന്നു എന്ന മൊഴി മഞ്ജു ആവര്‍ത്തിച്ചു.
ശബ്ദരേഖകള്‍ മിമിക്രിയാണെന്നായിരുന്നു ചോദ്യം ചെയ്യലില്‍ ദിലീപ് നല്‍കിയിരുന്ന മറുപടി. ദിലീപിൻ്റെയും മറ്റ് പ്രതികളുടെയും ശബ്ദ സാംപിളുകള്‍ ക്രൈംബ്രാഞ്ച് ശേഖരിച്ചിരുന്നു. ഇതിൻ്റെ ഫലം അടുത്തയാഴ്ച ലഭിക്കും.