കൊട്ടാരക്കര: അന്തരിച്ച മുന്‍ മന്ത്രി ആര്‍.ബാലകൃഷ്ണപ്പിള്ളയുടെ വിയോഗത്തോടെ വിസ്മൃതിയിലാകുന്നത് വലിയൊരു ചരിത്രം കൂടിയാണ്. പതിറ്റാണ്ടുകള്‍ നീണ്ട രാഷ്ട്രീയ ജീവിതത്തില്‍ നിരവധി ഉയര്‍ച്ചകളും താഴ്ചകളും കണ്ടു. അഴിമതിക്കേസില്‍ ശിക്ഷിക്കപ്പെട്ട് ജയിലില്‍ പോയ കേരളത്തിലെ ആദ്യത്തെ മന്ത്രി കൂടിയായിരുന്നു ബാലകൃഷ്ണപിള്ള. കൂറുമാറ്റ നിരോധന നിയമത്തിന്റെ പേരില്‍ സംസ്ഥാനത്തു അയോഗ്യനാക്കപ്പെട്ട ഏക എം.എല്‍.എയും അദ്ദേഹമായിരുന്നു. ഇടമലയാര്‍ അഴിമതിക്കേസിലാണ് സുപ്രിംകോടതി അദ്ദേഹത്തെ ഒരുവര്‍ഷം തടവിന് ശിക്ഷിച്ചത്. മറ്റൊരിക്കല്‍ 'പഞ്ചാബ് മോഡല്‍'എന്ന വിവാദ പ്രസംഗത്തിന്റെ പേരില്‍ മന്ത്രിസ്ഥാനം രാജിവയ്‌ക്കേണ്ടി വന്ന സാഹചര്യവും അദ്ദേഹത്തിനുണ്ടായി.

1982-87ല്‍ വൈദ്യുതി മന്ത്രിയായിരിക്കെയാണ് ഇടമലയാര്‍, കല്ലട പദ്ധതികളുമായി ബന്ധപ്പെട്ട അഴിമതിക്കേസില്‍ ബാലകൃഷ്ണപിള്ള ജയിലില്‍ പോയത്. എന്നാല്‍ ശിക്ഷാ കാലാവധി പൂര്‍ത്തിയാകുന്നതിന് മുമ്പ് കേരളപ്പിറവിയോട് അനുബന്ധിച്ച് ഇളവ് നല്‍കി 138 തടവുകാര്‍ക്കൊപ്പം ജയില്‍മോചിതനായി.

കെ.കരുണാകരന്‍ മന്ത്രിസഭയില്‍ വൈദ്യുതി മന്ത്രിയായിരുന്ന അദ്ദേഹത്തിന്റെ രാജിയിലേക്ക് നയിച്ച സംഭവമായിരുന്നു പഞ്ചാബ് മോഡല്‍ പ്രസംഗം. 1985ലായിരുന്നു ഇത്. പാലക്കാട്ട് അനുവദിക്കാമെന്നേറ്റ കോച്ച് ഫാക്ടറി പഞ്ചാബിലേക്കു കൊണ്ടുപോയതിനെതിരെ എറണാകുളം രാജേന്ദ്ര മൈതാനിയില്‍ നടന്ന കേരളാ കോണ്‍ഗ്രസ് സമരപ്രഖ്യാപന സമ്മേളനത്തില്‍ നടത്തിയ പ്രസംഗമാണ് വിവാദമായത്.
കോണ്‍ഗ്രസിലെയും കേരളാ കോണ്‍ഗ്രസിലെയും രാഷ്ട്രീയകളികളുടെ പിള്ളയ്ക്ക് മന്ത്രിസ്ഥാനം രാജിവെക്കേണ്ടി വന്നു. പിന്നീട് 2015ല്‍ തന്റെ അന്നത്തെ പ്രസംഗം ശരിയായിരുന്നെന്ന് അദ്ദേഹം പറയുകയും ചെയ്തു.

രാഷ്ട്രീയത്തിനു പുറമെ സിനിമയിലും ഒരുകൈ നോക്കിയിട്ടുണ്ട്. മകന്‍ ഗണേഷ്‌കുമാറിന് മുമ്പേ കാമറയ്ക്ക് മുന്നിലെത്തിയതും പിള്ള തന്നെ. 'ഇവളൊരു നാടോടി' എന്ന ചിത്രത്തിലാണ് ബാലകൃഷ്ണപിള്ള ആദ്യം അഭിനയിച്ചത്. 'നീലസാരി' എന്ന സിനിമയിലും ചെറിയ വേഷത്തിലെത്തി. സുകുമാരന്‍ നായകനായ 'വെടിക്കെട്ടില്‍' അഭിനയിക്കുന്നതിനിടെയാണ് വൈദ്യുതി മന്ത്രിയാകുന്നത്.