തിരുവനന്തപുരം: സംസ്ഥാനത്ത് പ്ലസ് വണ്‍ പരീക്ഷ മാറ്റിവെച്ചു. പരീക്ഷ ജൂണ്‍ 13 മുതല്‍ 30 വരെ നടത്തുമെന്ന് വിദ്യാഭ്യാസമന്ത്രി വി.ശിവന്‍കുട്ടി അറിയിച്ചു.

പ്ലസ് വണ്‍, വിഎച്ച്എസ്ഇ പരീക്ഷ ജൂണ്‍ 2 മുതല്‍ 18 വരെ നടത്തുമെന്നായിരുന്നു നേരത്തേ അറിയിച്ചിരുന്നത്. ജൂണ്‍ രണ്ടു മുതല്‍ പ്ലസ് ടു മോഡല്‍ പരീക്ഷ നടത്തുമെന്ന് മന്ത്രി പറഞ്ഞു. ജൂണ്‍ ഒന്നിന് സ്‌കൂള്‍ പ്രവേശനോത്സവം നടത്തും. കൊവിഡ് മാര്‍ഗ രേഖ പിന്തുടര്‍ന്നാകും പ്രവേശനോത്സവമെന്നും മന്ത്രി അറിയിച്ചു.

സ്‌കൂള്‍ തുറക്കലുമായി ബന്ധപ്പെട്ട് തിരുവനന്തപുരത്ത് വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.മിക്‌സഡ് സ്‌കൂളുകളാക്കാന്‍ നിരവധി അപേക്ഷകള്‍ ലഭിക്കുന്നുണ്ട്.

കൃത്യമായ മാര്‍ഗരേഖ പ്രകാരം അപേക്ഷിക്കുന്നവര്‍ക്ക് അനുവദിക്കുമെന്നും മന്ത്രി പറഞ്ഞു.സ്‌കൂള്‍ പ്രവേശനത്തിനായി 9.34 ലക്ഷം കുട്ടികളാണ് പുതുതായി എത്തിയത്.ഈ മാസം 29 മുതല്‍ ഒന്നാം ക്ലാസിന്റെ പ്രവേശന നടപടികള്‍ ആരംഭിക്കും.