ജിദ്ദ:അനധികൃതമായി പ്രവര്‍ത്തിക്കുന്ന ഫോറിന്‍ എകസ്‌ചേഞ്ച് സ്ഥാപനങ്ങളിലൂടെ സാമ്പത്തിക തട്ടിപ്പ് വ്യാപകമാകുന്നു. ഇത്തരം ഇടപാടുകള്‍ നടത്തി വഞ്ചിതരാവരുതെന്ന് സൗദി വ്യാപാര മന്ത്രാലയത്തിന്റെ മുന്നറിയിപ്പ്.

'ലൈസന്‍സില്ലാതെ വിദേശ വിനിമയ ഇടപാടുകള്‍ പ്രോത്സാഹിപ്പിക്കുന്ന ആളുകളുമായോ സ്ഥാപനങ്ങളുമായോ ഉള്ള ഇടപാടുകള്‍ കാരണം പണം നഷ്ടപ്പെട്ടേക്കാമെന്ന് അധികൃതര്‍ മുന്നറിയിപ്പ് നല്‍കി. ഉപഭോക്തൃ ഫണ്ടുകള്‍ പരിപാലിക്കുന്നതിനും സുരക്ഷിതമാക്കുന്നതിനും അനുയോജ്യമായ ഗ്യാരണ്ടി ഇല്ലാത്ത പക്ഷം മുഴുവന്‍ ഓഹരി മൂലധനവും നഷ്ടപ്പെടുമെന്ന് മന്ത്രാലയം മുന്നറിയിപ്പ് നല്‍കി. നിരവധി ആളുകള്‍ വഞ്ചിതരാകാന്‍ സാധ്യതയുള്ളതിന്റെ പശ്ചാത്തലത്തില്‍ സൗദി സെന്‍ട്രല്‍ ബാങ്കും ക്യാപിറ്റല്‍ മാര്‍ക്കറ്റ് അതോറിറ്റിയും (സിഎംഎ) വാണിജ്യ മന്ത്രാലയവും ചേര്‍ന്ന് സെക്യൂരിറ്റികളില്‍ നിക്ഷേപം നടത്തുന്ന സംശയാസ്പദമായ വെബ്‌സൈറ്റുകള്‍ കൈകാര്യം ചെയ്യുന്നതിലെ അപകടങ്ങളില്‍ നിന്ന് സമൂഹത്തെ സംരക്ഷിക്കുന്നതിനായി ഒരു ബോധവല്‍ക്കരണ കാംപയിന്‍ ആരംഭിച്ചിരിക്കുകയാണ്.

ലൈസന്‍സില്ലാത്തതോ വഞ്ചനാപരമായതോ ആയ കമ്പനികളോ വ്യക്തികളോ എങ്ങനെ പ്രവര്‍ത്തിക്കുന്നു, വഞ്ചിതരാകുന്നവരെ നിയമവിരുദ്ധമായ വിദേശ വിനിമയത്തിലോ ക്രിപ്‌റ്റോകറന്‍സി വിപണികളിലേക്കോ ആകര്‍ഷിക്കുന്നതിനുള്ള അവരുടെ നൂതന രീതികളെക്കുറിച്ച് അവബോധം സൃഷ്ടിക്കുമെന്നും വാണിജ്യ മന്ത്രാലയം വ്യക്തമാക്കി.