റിയാദ്: ഉമ്മുല്‍ ഖുറാ കലണ്ടര്‍ പ്രകാരം സൂര്യ ഉദയത്തിനു ശേഷം കാല്‍ മണിക്കൂര്‍ കഴിഞ്ഞാല്‍ ഈദുല്‍ ഫിതറിന്റെ സമയമായിരിക്കുമെന്നും ഇതിനായി പള്ളികളും മറ്റു നിസ്‌കാര സ്ഥലങ്ങളും ഈദ് ഗാഹുകളും സജ്ജമാക്കണമെന്നും മതകാര്യ വകുപ്പ് മന്ത്രി ഡോ. അബ്ദുലത്തീഫ് അല്‍ശെയ്ഖ് ഉത്തരവിട്ടു.

പള്ളികളിലും പെരുന്നാള്‍ നിസ്‌കാരത്തിനായി സജ്ജമാക്കപ്പെട്ട മറ്റു സ്ഥലങ്ങളിലും എല്ലാ ഒരുക്കങ്ങളും നടത്താനും മന്ത്രാലയത്തിലെ വിവിധ വിഭാഗങ്ങള്‍ക്കും മന്ത്രി നിര്‍ദേശം നല്‍കി. കൊവിഡ് നിയന്ത്രണത്തിന് ശേഷം വലിയ രീതിയില്‍ വിശ്വാസികള്‍ ഒരുമിച്ച് കൂടുന്ന നിസ്‌കാരമായിരിക്കും ഈ പെരുന്നാളിന് നടക്കുക.