ന്യൂഡല്‍ഹി: കേന്ദ്രം വാഗ്ദാനം ചെയ്ത ഓക്സിജന്‍ കൃത്യമായി ലഭിക്കുകയാണെങ്കില്‍ ഒരാള്‍ പോലും ഡല്‍ഹിയില്‍ ശ്വാസം മുട്ടി മരിക്കില്ലെന്ന് ഡല്‍ഹി മുഖ്യമന്ത്രി അരവിന്ദ് കെജ്രിവാള്‍.

പ്രതിദിനം 700 മെട്രിക് ടണ്‍ ഓക്സിജന്‍ എത്തിക്കാമെന്നാണ് കേന്ദ്രസര്‍ക്കാര്‍ വാഗ്ദാനം ചെയ്തിരുന്നതെന്നും അദ്ദേഹം പറഞ്ഞു.

ഡല്‍ഹിക്ക് ആദ്യമായി കഴിഞ്ഞ ദിവസം 730 ടണ്‍ ഓക്‌സിജന്‍ കിട്ടി. ഡല്‍ഹിക്ക് പ്രതിദിനം 700 ടണ്‍ ആവശ്യമാണ്. കേന്ദ്ര സര്‍ക്കാര്‍, ഡല്‍ഹി ഹൈക്കോടതി, സുപ്രീംകോടതി എന്നിവരോട് നന്ദി അറിയിക്കുന്നു. അവരുടെ പരിശ്രമത്തിന്റെ ഫലമായാണ് ഞങ്ങള്‍ക്ക് ഓക്‌സിജന്‍ ലഭിച്ചത്. ഇതിന്റെ വിതരണം ഇനി കുറയ്ക്കരുതെന്ന്് അഭ്യര്‍ഥിക്കുന്നു- ഡല്‍ഹി മുഖ്യമന്ത്രി പറഞ്ഞു.

'കേന്ദ്രം വാഗ്ദാനം ചെയ്ത 700 ടണ്‍ ഓക്സിജന്‍ ലഭിക്കുകയാണെങ്കില്‍ 9,000-9,500 കിടക്കകള്‍ ഡല്‍ഹിയില്‍ സ്ഥാപിക്കാന്‍ ഞങ്ങള്‍ക്ക് കഴിയും. ഇതിലൂടെ കൂടുതല്‍ ഓക്സിജന്‍ കിടക്കകള്‍ സ്ഥാപിക്കാന്‍ കഴിയും. ഓക്സിജന്‍ ലഭിക്കാത്തതിന്റെ പേരിലുള്ള മരണങ്ങള്‍ പൂര്‍ണ്ണമായി ഒഴിവാക്കാന്‍ സാധിക്കും', കെജ്രിവാള്‍ പറഞ്ഞു.