തിരുവനന്തപുരം: സില്‍വര്‍ ലൈന്‍ സംവാദത്തില്‍ അതിവേഗപാതയ്ക്ക് പകരം ബദല്‍ മാര്‍ഗമാണ് വേണ്ടതെന്ന് പ്രൊഫ.ആര്‍.വി.ജി മേനോന്‍. അമേരിക്കയിലെ റെയില്‍വേ സിസ്റ്റം നശിപ്പിച്ചത് ഓട്ടോമൊബൈല്‍ ലോബിയാണ്. വിപണിക്കായി വികസനം തിരിച്ച് വിടരുത്. അവര്‍ നമ്മുടെ ചിന്തയും വിപണിക്കനുസരിച്ച് തിരിച്ചുവിടുമെന്നും അദ്ദേഹം പറഞ്ഞു.
എല്ലാം തീരുമാനിച്ചു. എന്ത് വില കൊടുത്തും നടപ്പാക്കുമെന്ന് പ്രഖ്യാപിച്ചു. ഇനി ചര്‍ച്ച നടത്താം എന്ന് പറയുന്നതില്‍ മര്യാദ കേടുണ്ട്. നേരത്തേ നമ്മള്‍ ചര്‍ച്ച നടത്തേണ്ടിയിരുന്നു.
160 കിമീ സ്പീഡില്‍ ഓടുന്ന തീവണ്ടി ഇന്ത്യയില്‍ത്തന്നെ വികസിപ്പിക്കുന്നില്ലേ? അത് നിലവിലെ ബ്രോഡ് ഗേജില്‍ ഓടിച്ചുകൂടേ? ഏത് പ്രക്രിയയിലൂടെയാണ് ഇതല്ല, സില്‍വര്‍ ലൈന്‍ തന്നെ വേണം എന്ന് തീരുമാനിച്ചത് എന്ന് ജനങ്ങള്‍ക്ക് അറിയാനുള്ള അവകാശമില്ലേ.? അദ്ദേഹം ചോദിച്ചു.

പൊതുഗതാഗതം വളരെ പ്രധാനമാണ്. റെയില്‍വേ ഗതാഗതവും. അരൂര്‍ മുതല്‍ ചേര്‍ത്തല വരെ നാല് വരിപ്പാത എടുത്തിട്ട് 20 വര്‍ഷമായി. സ്ഥലം കൊടുത്തതാണ് നാട്ടുകാര്‍. പദ്ധതി മാത്രം വന്നില്ല. ശുദ്ധകഴിവുകേടുകൊണ്ടാണിത് സംഭവിച്ചത്.
റെയില്‍വേ ഇരട്ടിപ്പ് ഇപ്പോഴും ഇഴഞ്ഞുനീങ്ങാനുള്ള കാരണവും കഴിവുകേടുതന്നെയാണെന്ന് അദ്ദേഹം പറഞ്ഞു.

626 വളവുകളുണ്ട്, അവിടെ 200 കി മീ സ്പീഡില്‍ ഓടിക്കാനാകില്ല, അത് ശരിയാണ്. വളവ് നിവര്‍ത്തിയുള്ള പാത ഇട്ടാല്‍ മതിയാവില്ലേ? അത്തരത്തില്‍ ഒരു പദ്ധതി വിഭാവനം ചെയ്തുകൂടേ? എറണാകുളം തൃശ്ശൂര്‍ ഷൊര്‍ണൂര്‍ മൂന്നാമത്തെ പാത ഇട്ടുകൂടേ? ഇത് മാത്രം പോരാ, തെക്കോട്ടും വടക്കോട്ടും പാതകള്‍ വേണം. രണ്ടിന്റെയും ചെലവ് താരതമ്യം ചെയ്യണം.
കൂടുതല്‍ സ്പീഡുകളുള്ള വണ്ടികള്‍ വന്നാല്‍ മിനിറ്റുകള്‍ ഇടവിട്ട്, തീവണ്ടികള്‍ ഓടിക്കാനാകും. വളവ് നിവര്‍ത്തി മൂന്നാമത്തെ ലൈന്‍ ഇടുന്നതാകും ചെലവ് കുറയ്ക്കാനും പാരിസ്ഥിതികാഘാതം കുറയ്ക്കാനും നല്ലത്. റെയില്‍വേ ലൈനിന് അടുത്തുള്ള സ്ഥലങ്ങള്‍ക്ക് ചെലവ് കുറവാണ്.

മൂന്ന് മണിക്കൂറില്‍ ജനശതാബ്ദി കോഴിക്കോട്ട് നിന്ന് എറണാകുളത്ത് എത്തും. റെയില്‍വേയ്ക്ക് നമ്മളോട് അവഗണനയാണ്. എത്ര കോടി സതേണ്‍ റെയില്‍വേയ്ക്കും നോര്‍ത്തേണ്‍ റെയില്‍വേയ്ക്കും നല്‍കി. അതില്‍ രാഷ്ട്രീയമുണ്ട്.
ദീര്‍ഘദൂരട്രെയിനുകള്‍ക്കൊന്നും നിലവില്‍ സില്‍വര്‍ ലൈനിലേക്ക് കയറാന്‍ കഴിയില്ല. മുഖത്തലയില്‍ നിന്ന്, കാക്കനാട്ട് നിന്ന് ഒക്കെ കൊല്ലത്തേക്കും എറണാകുളത്തേക്കും പോകണം. വെള്ളമൊഴുകുന്ന തോടുള്ള സ്ഥലത്താണ് മുഖത്തലയില്‍ സ്റ്റേഷന്‍ വരുന്നത്. പരിസ്ഥിതി ശാസ്ത്രജ്ഞര്‍ കൃത്യമായി പാരിസ്ഥിതികാഘാതം പഠിക്കണം. അതിന് സൗകര്യമുണ്ടാകണമെന്നും അദ്ദേഹം ആവശ്യപ്പെട്ടു.