ജറൂസലേം: ഫലസ്തീനില്‍ വീണ്ടും ഇസ്‌റാഈല്‍ സൈന്യത്തിന്‍രെ തേര്‍വാഴ്ച. തിങ്കളാഴ്ച പുലര്‍ച്ചെനടത്തിയ വെടിവെപ്പില്‍ നിരവധിയാളുകള്‍ക്ക് പരുക്കേറ്റതായാണ് റിപ്പോര്‍ട്ട്. ആറ് മാധ്യമപ്രവര്‍ത്തകര്‍ക്കും പരുക്കേറ്റതായി റിപ്പോര്‍ട്ടുകള്‍ പറയുന്നു. അറുപതോളം ആളുകളെ ആശുപത്രിയിലേക്ക് മാറ്റിയിട്ടുണ്ട്.

റമദാനിലെ അവസാന വെള്ളിയാഴ്ച ഇസ്റാഈല്‍ സൈന്യം നടത്തിയ ആക്രമണത്തില്‍ 200ലേറെ ആളുകള്‍ക്ക് പരുക്കേറ്റിരുന്നു. ഇതില്‍ 88 പേരെ ആശുപത്രിയില്‍ പ്രവേശിപ്പിച്ചതായും ഫലസ്തീനിയന്‍ റെഡ് ക്രെസന്റ് പറയുന്നു.

വെള്ളിയാഴ്ചത്തെ ഇസ്റാഈല്‍ സൈനിക ആക്രമണങ്ങള്‍ക്കു പിന്നാലെ അല്‍ അഖ്സ പള്ളിയില്‍ 27ാം രാവില്‍ പതിനായിരക്കണക്കിന് വിശ്വാസികളാണ് പ്രാര്‍ത്ഥനക്കെത്തിയത്. സ്ത്രീകളും കുട്ടികളുമെല്ലാം പ്രാര്‍ത്ഥനയില്‍ പങ്കെടുക്കാനെത്തിയിരുന്നു. അന്നും സൈന്യം ആക്രമണം അഴിച്ചു വിട്ടു. നിരവധി പേര്‍ക്ക് പരുക്കേല്‍ക്കുകയും ചെയ്തിരുന്നു.

ജറൂസലേമില്‍ നിന്ന് ഫലസ്തീനികളെ കുടിയൊഴിപ്പിക്കുന്നതിനെതിരെ പ്രതിഷേധവുമായി സംഘടിച്ചവര്‍ക്കു നേരെയാണ് മസ്ജിദിനകത്തും പുറത്തും ഇസ്‌റാഈല്‍ സൈന്യത്തിന്റെ അതിക്രമമുണ്ടായത്. റമദാനിലെ അവസാന വെള്ളിയാഴ്ച രാത്രിയിലായിരുന്നു നൂറുകണക്കിന് ഫലസ്തീനികള്‍ സംഘടിച്ചത്.

ടിയര്‍ ഗ്യാസും, ഗ്രനേഡും, ബുള്ളറ്റും ഉപയോഗിച്ചായിരുന്നു അക്രമം. പലര്‍ക്കും പരിക്കേറ്റത് കണ്ണിനും തലയ്ക്കുമാണെന്ന് റെഡ് ക്രെസന്റ് പറയുന്നു.