തിരുവനന്തപുരം: കേരളത്തിന്റെ സമരപോരാട്ടങ്ങള്‍ക്കെന്നും നേതൃത്വം വഹിച്ച് പാവങ്ങള്‍ക്ക് വേണ്ടി ജീവിച്ച ഒരു വ്യക്തിത്വമാണ് കെ.ആര്‍ ഗൗരിയമ്മയുടേത് എന്ന് പ്രതിപക്ഷനേതാവ് രമേശ് ചെന്നിത്തല അനുസ്മരിച്ചു. തനിക്ക് ശരിയെന്ന് തോന്നുന്ന നിലപാടുകളില്‍ ഉറച്ച് നിന്നു. രാഷ്ട്രീയമായി എതിര്‍ചേരിയില്‍ നിന്ന സന്ദര്‍ഭത്തില്‍ പോലും വ്യക്തിപരമായി ബന്ധങ്ങള്‍ കാത്തുസൂക്ഷിക്കാനും വളരെയേറെ സ്‌നേഹബന്ധങ്ങള്‍ വച്ചുപുലര്‍ത്താനും കഴിഞ്ഞിട്ടുള്ള ഒരു വ്യക്തിത്വമാണ് ഗൗരിയമ്മയുടേതെന്നും രമേശ് ചെന്നിത്തല പറഞ്ഞു.
വലിയ വേദന നല്‍കുന്ന വിയോഗമാണ് കെ ആര്‍ ഗൗരിയമ്മയുടേത്. ഗൗരിയമ്മയുമായി വളരെ അടുത്ത ബന്ധം എനിക്കുണ്ടായിരുന്നു. അത് എതിര്‍ക്കുന്ന കാലഘട്ടത്തിലും അനുകൂലിക്കുന്ന കാലഘട്ടത്തിലുമെല്ലാം വളരെയേറെ സ്‌നേഹവും വാത്സല്യവും ഞങ്ങളെപ്പോലെയുള്ള പൊതുപ്രവര്‍ത്തകര്‍ക്ക് നല്‍കിയിട്ടുള്ള ഒരമ്മയുടെ സ്ഥാനമാണ് ഗൗരിയമ്മയ്ക്കുള്ളത്. ആലപ്പുഴ ജില്ലയിലെ രാഷ്ട്രീയപ്രവര്‍ത്തനങ്ങള്‍ക്കിടയില്‍ എപ്പോഴും കാണാനും ആ സ്‌നേഹം അനുഭവിക്കാനും ഉള്ള അവസരം എനിക്ക് ലഭിച്ചിട്ടുണ്ട്. ചെന്നിത്തല പറഞ്ഞു.