വാഷിങ്ടണ്‍: വൈറ്റ് ഹൗസില്‍ നടന്ന ഈദുല്‍ ഫിത്വര്‍ ആഘോഷത്തില്‍ പങ്കെടുത്ത് അമേരിക്കന്‍ പ്രസിഡന്റ് ജോ ബൈഡന്‍. ലോകമെമ്പാടുമുള്ളവര്‍ക്ക് ഈദ് ആശംസകള്‍ നേര്‍ന്നുകൊണ്ട് അദ്ദേഹം തന്നെയാണ് ചടങ്ങിലെ ഫോട്ടോകള്‍ ഉള്‍പ്പടെ ഫേസ്ബുക്കില്‍ പങ്കുവച്ചത്.

'ഇന്ന്, ഈ പുണ്യദിനം ആഘോഷിക്കാന്‍ കഴിയാത്ത എല്ലാവരെയും ഞങ്ങള്‍ ഓര്‍ക്കുന്നു, ഉയ്ഗറുകളെ, റോഹിങ്ക്യകളെ, പട്ടിണി, അക്രമം, സംഘര്‍ഷം, രോഗം എന്നിവ നേരിടുന്ന എല്ലാവരെയും.

നമ്മള്‍ കാണാന്‍ ആഗ്രഹിക്കുന്ന ലോകത്തേക്കുള്ള പ്രതീക്ഷയുടെയും പുരോഗതിയുടെയും അടയാളങ്ങളെ നോക്കുക, പ്രത്യേകിച്ചും യെമനില്‍ വെടിനിര്‍ത്തല്‍ പ്രഖ്യാപിച്ചതുകൊണ്ട് ആറു വര്‍ഷത്തിനിടെ ആദ്യമായി സമാധാനത്തോടെ ഈദ് ആഘോഷിക്കാന്‍ യെമനിലെ ജനങ്ങള്‍ക്ക് സാധിച്ചിരിക്കുന്നു,' ബൈഡന്‍ പറഞ്ഞു.

പാകിസ്ഥാന്‍ ഗായകനും സംഗീതസംവിധായകനുമായ അരൂജ് അഫ്താബ് ഈദ് ഉല്‍ ഫിത്തര്‍ ആഘോഷത്തിലെ പ്രധാനപ്രാസംഗികരില്‍ ഒരാളായിരുന്നു. ജില്‍ ബൈഡന്‍, വാഷിംങ്ടണ്‍ ഡിസിയിലെ 'ദി നേഷന്‍സ് മോസ്‌ക്' എന്നറിയപ്പെടുന്ന മസ്ജിദ് മുഹമ്മദിന്റെ ഇമാം ഡോ. താലിബ് എം. ഷെരീഫ് എന്നിവരായിരുന്നു മറ്റ് പ്രാസംഗികര്‍.